Изгелеккә игелек иярә

   Махсус хәрби операция башлану  белән  “волонтерлар” дигән  төшенчәнең асылы тагын да  ачылып, Ватан хакына  игелекле эшләргә күтәрелгән халкыбызның бердәмлеген, таулар күчерер көч-куәте барлыгын янә бер кат исбатлады. Игелек кылу – ул һәркемнең вөҗдан эше. Изге ниятле меңләгән  райондашларыбыз кебек үк Шәмәрдәндә яшәүче Зөлфия апа Фәхертдинованың  да  күңелендә   яшәгән игелеклелек, мәрхәмәтлелек хисләре изге гамәлләр булып ташып чыга. 

“Хәят” оешмасының актив әгъ­засы, тынгысыз йөрәкле Зөлфия ханым махсус хәрби операциядәге ир-егетләргә иң беренчеләрдән булып тиз әзерләнә  торган ашлар  өчен яшелчәләр киптерергә  керешә.  Оешма җитәкчесе Гөлнара Фәтхрахманова тәкъдим итүгә, ике дә уйламый бу эшкә ризалаша ул. Сугышчыларга әлеге ашларның никадәр  мөһимлеген күзаллау гына да  эшне тиз арада башларга этәрә.  “Гөлнара миңа Сызраньда ашлар  өчен яшелчәләр киптерелүен,  моны үзебездә дә башласак дигән фикер җиткерде. Мин шунда ук риза булдым. Сызрань шәһәренең бу эш белән шөгыльләнүчеләре белән видеоэлемтәгә чыгып, неч­кәлекләре турында сораштык.  Шу­шы көнне үк  өебез  подвалының бер бүлмәсен бушатып, цех итеп үзгәрттек. Җиң сызганып эшкә керештем. Иң беренче бәрәңге киптерүдән башладым. Аннары авылларга йөреп, мастер-класслар да күрсәттек, башкалар да иярде”, – дип сөйли Зөлфия Габделсамат кызы. “Cолдатка аш” проектына нигез әнә шулай салына. Әлеге хезмәтнең никадәр вак, күп вакыт, көч сораганын яшерми ул. Башта яшелчәләрнең барысын да аерым-аерым  пешерергә кирәк.  Аннары  эре угычтан уып, махсус киптерү җайланмасына  урнаштырасы. Алар 10-14 сәгать буе кибә. Төне буе сеткаларны алыштырып, йокламыйча  саклап чыгарга  кирәк. Шулай булмаганда, көю ихтималы  да зур. Мәсәлән,  рассольник өчен  тозлы кыяр 16 сәгать киптерелә, ул 3 литрлы  банкадан 45-50 грамм гына кала.  Әлеге киптерелгән яшелчәләр  махсус хәрби  операциядәгеләргә борщ, харчо, рассольник өчен  махсус пакетларга тутырылып, әзер ашлар итеп җибәрелә.

Яшелчәләр киптерү белән бер­рәттән, Зөлфия Фәхертдинова сборлар ачып, махсус хәрби опе­рациядә катнашучыларга ки­рәк-яраклар алу өчен ак­ча җыюны да оештыра. Бу эшнең дә никадәр җаваплылык, төгәллек   соравын аңлатып тора­сы юк.  “Инде өч-дүрт тонна яшел­чә киптергәнмендер. Кызлар да бик булыша. Без Язилә Аб­дуллина, Ирина Абросимова,  Миләүшә Сергеева, Гүзәл Нурисламова,  Гөлфия Әхмәдиева, Илсөяр Кәбирова, Зөлфия  Таһирова бер команда булып эшлибез.   Шулай ук Алсу Юнысова, Люция  Госманова  ки­рәк-яраклар тегеп зур ярдәм күр­сәтәләр. Шәмәрдән халкы бик актив, бердәм,  акчалата ярдәм күрсәтүчеләр бик  күп.  Җыелган акчага ике тонна тавык ите алып,  аны  иттарткычтан чыгарып,  аш өчен киптердек. Өйдә көн-төн  өчәр сушилка эшләде.  Ирем дә волонтер.  “Аква-двери”  оешмасы ярдәмендә 20ләп  яшелчә киптерү җайланмасы ясадылар. Барлык җыйналган гуманитар ярдәмне үзебездә туплыйбыз да, ирем белән  атнага өч тапкыр Сабадагы штабка илтәбез. Ирем изге юлда йөрүемне хуплап, булдыра алганча ярдәм итәргә кирәклеген  кабатлап кына тора”, – дип сөйли Зөлфия апа.  Әлбәттә,  ягылган бензин да,  тотылган электр энергиясе  бәясе  барысы да  үз хисапларыннан,  Аллаһ ризалыгы өчен башкарыла.  Бер дә ял итмичә, гел аяк өстендә эшләве Зөлфия ханымның сәламәтлеген дә какшата. Аягына катлаулы операция ясатырга туры килә. Табиблар сакланырга өндәп кайтарсалар да, ул   хастаханәдән чыгуга, ике  көннән соң яңадан үзенең яшелчә киптерү җайланмасы каршысына баса. Чираттагы ялга кайткан  солдатларның  чын  ихластан әйтелгән рәхмәт сүзләре, фронттан  һәм  “Фронтовые перевозчики”  фондыннан юлланган Рәхмәт хатлары аңа  игелекле  эшенә көч-куәт, күңеленә  рух  өсти. “Күрше егете махсус хәрби операциядә катнаша. Ул чираттагы ялга кайткач: “Гуманитар ярдәмне алып, “Солдатка аш” сүзен күрүгә,  туган районымнан, күршем  Зөлфия апа ясаган ашлар дип,  рәхмәт әйтә-әйтә ашыйм. Сезнең ашлар белән көч алабыз”, –  дип сөйли.  Аның йөрәк түреннән чыккан рәхмәт сүзләрен еламый  тыңлап та булмый”, – дип сөйли  әңгәмәдәшем. “Безгә күрсәткән ярдәмнәрегез өчен сезгә ихлас рәхмәтебезне җиткерәбез. Кайгыртучанлык, ихтирам хисләре, йөрәк җылысы кушып язылган хатлар, изге теләкләр теләп тутырылган посылкалар сугыш утын кичеп, алгы сызыкка кадәр килеп җитә, юеш, салкын окопларны җылытып, безгә соңгы тамчы канга кадәр сакларга ант иткән туган җиребезне якларга өнди. Без бергә-бергә җиңүгә ирешүебезгә ышанабыз. Көтегез безне! Сезнең алда баш иябез”, – дип язылган солдатлардан килгән Рәхмәт хатлары Зөлфия апа Фәхертдинова  өчен барыннан да кадерлерәк.  Әлеге изге эш никадәр игелекле кешеләрне берләштерә.  “Үзебезнең группага нәрсә  кирәген генә язам,  капчыклап китерәләр.  Эшебез җайга салынган. Кайсы авылга күбрәк җыела, шуннан ирем белән алып кайтып, эшкә керешәбез. Бертуган сеңлем Гөлфия дә чәк-чәкләр пешерә. Зәлия Галиева сохари киптерә. Ятьмә үрү дә бик яхшы оештырылган”, – дип сөйли ул. 

Йомышы төшеп Шәмәрдәнгә килгән волонтер Гөлназ Әгъ­лә­мет­динованы да Зөлфия ападан ма­шинасына гуманитар ярдәм төягән вакытта очраттык. Юлбат авылында яшәүче  Гөлназ да штаб юлына тузан төшерми.  “Бу эшкә кереп киткәч, туктап  тору мөмкин түгел. Бер барып күргәч, булышасы  килә.   Кайчак арылып, туктыйм дигән, уйлар килә дә,  егетләргә ничек кирәклеген аңлап, тагын кабынып эшкә керешәсең. Бер тапкыр штабтагы мохитне күргәч, өйдә тыныч кына яту мөмкин түгел.  Күңел шунда тарта, аңлатып та булмый. Без дүрт бертуган – Мичәндә Рәзилә Мөбарәкшина, Туктарда Фәнзия Хәйбиева, Тенекидә  Регина Кәримова, Юлбатта үзем  куратор булып, әлеге изге эшкә үз өлешебезне кертәбез.  Мин кибетче булып ике көн эшлим, ике көн ял итәм. Буш арамда штабка ашыгам.  Килә алмаганда, өйдә сохари киптерәм.   Инде ярты ел өйдә  ике-өч хатын белән  токмач кисәбез. Авыл халкына бик зур рәхмәт, группага язуга бердәм күтәреләләр. Олы йөрәкле, изге ниятле кешеләр күп”, – ди Гөлназ.    Изге эшкә һәркем күңел кушуы буенча  тартыла.  Шөкер, күңеле изгелектә булганнар күп булуы куандыра.