Фермерны кызыксындыручы грант

5 апрельдә Авыл хуҗалыгы һәм азык-төлек министрлыгы, фермерлар ассоциациясе үткәргән видеорежимдагы конференциядә дә гаилә фермалары һәм кооперативларга бирелүче грантлар хакында сүз барды. Аларның суммасы шактый. Мисалга, сөтчелек тармагы яки эре терлек симертү юнәлешендә эш башлаучыларга 3 миллион, калган тармакларга 1,5 миллионга кадәр субсидия бирү каралган. Эшләрен дәвам итүче фермерларга 7 миллион сумга кадәр субсидия биреләчәк. Шулай ук, авыл хуҗалыгында җитештерелгән продук­цияне эшкәртү өчен авыл хуҗалыгы кооператив­ларына матди-техник ба­заны яңартуга да субсидия каралган. Министр урынбасары Ришат Хәби­пов мәгълүматыннан кү­рен­гәнчә, грант алырга теләүчеләрнең һәр ка­­те­гориясе өчен үз таләп­ләре билгеләнгән. КФХның яисә кооперативның салым бурычы булмаска тиеш, ликвидация, үзгәртеп кору яисә бөлгенлек хәлендә булмавы, кимендә 5 елга исәпләнгән нигезле бизнес-проекты булуы шарт. Программада катнашучы грант алган елда яңа эш урыннары булдыра һәм аларны 5 ел дәвамында саклый. Яңа эш башлаучылар, гаилә фермерлары үз чиратында халыкка эш урыннары булдырырга бурычлы. Авыл хуҗалыгы коопертивлары оештырган очракта 3 миллион сумга - 1, яңа эш башлаучыларга 1 миллионга 1 кешене эшле итү бурычы куела. Программаларның тулы эшчәнлеген һәм өс­тәмә мәгълүматлар ту­­рында башкарма коми­тетның ин­вес­ти­цияләр һәм территориаль үсеш бүлегенә 2-36-54, 2-32-73 телефонына шалтыратып һәм agro.tatarstan.ru сайтыннан укып белергә мөмкин.

Районда яңа эш башларга теләк белдерүчеләрнең күбесе терлек симертү, савым фермалары төзү, атлар үрчетү буенча бизнес-проектларын яклаячак. Кошчылык буенча казлар, чебиләр алып үстеререргә теләк белдерүчеләр дә бар.

- Программалар буенча күбрәк Саба авыл җир­ле­гендә яшәүчеләр мө­рә­җәгать итә. Алар Са­баның үзендә түгел, чит җирлекләрдә эшләргә җы­е­налар. Шулай ук, Сабабаш, Шыңар, Нырты, Юлбат, Мишәбаш, Кибәче, Эзмә, Шәмәрдән, Арташ, Калатау, Төбәк авылларыннан да грант алуда катнашырга теләк белдереп, гаризалар керде. Әлеге авыллар кергән авыл җирлекләре бу мәсьәләдә шактый еллар актив эш алып баралар. Һәм алар бер-берсенә үрнәк күрсәтеп, яхшы мөнәсәбәттә ка­лып, үз эшен башларга теләк бел­де­рүчеләрне яңа эшкә өн­диләр. Өстәп шуны да әйтергә кирәк, элек гаилә фермалары буенча халыкны эш белән тәэмин итү үзәге аша 58800 сум акча алган кешеләр моңарчы грант алу конкурсына кертелми иде. Быел алар да конкурска керергә хокукка ия. Без фер­мер­ларга, кооперативларга, шәх­си хуҗалыкларга ярдәм итәргә әзер, - ди башкарма комитет җитәкчесе урынбасары Илнур Котдусов.