1 апрельдән Саба районында исталык икеайлыгы старт ала

1 апрельдән Саба муниципаль районы башкарма комитеты карары нигезендә авыл һәм шәһәр җирлекләре биләмәләрен санитар чистартуны хәл итү, территорияләрне ха­­лыкның санитария-эпиде­миология, экология имин­легенә җавап бирә торган хәлгә китерү максатында чисталык икеайлыгы старт ала. Традициягә кергән мөһим чара 31 майга кадәр дәвам итәчәк. Бу хакта өченчекөн рай­он активы белән үткә­релгән киңәшмәдә җит­ди сүз булды. "Барлык оеш­ма-предприятиеләр, бюджет, учреждениеләр җитәкчеләре, коммуналь хез­мәтләр, авыл җир­лек­ләре башлыклары, шәхси эшмәкәрләр бүген барысы да биредә. Нинди бу­рычлар куелганлыгы, нәр­сәләр эшлисе икәнлеге, хезмәт фронты барыгызга да билгеле. Әйткәнне кө­теп торасы түгел. Эко­логия, иҗтимагый тирә­лекләр елында чисталык мәсьәләсенә игътибар тагын да артырга тиеш. Таләпчәнлекне штраф санк­цияләренә ге-­нә кай­тарып калдырасы түгел­дер",- дип сөйләде баш­карма комитет җитәк­чесе Равил Гасыймов һәм эш­не һава шартлары мөм­кинлек бирүгә карап тер­ри­торияләрдәге карны таратудан башларга тәкъдим итте. Сабаның урманлы район булуы да исәпкә алынды. Бу уңайдан әгәр кайдадыр эко­логия кагыйдәләре үтәл­­ми икән, штраф санк­цияләрен агач утырту ча­расы белән алыштыру ту­рында фикерләр әй­телде. Икеайлык чорында башкарылган эшләр турында мәгълүматны исә быел инфраструктура үсе­ше бүлегенә атна саен җит­кереп барырга кирәк булачак.

Каты көнкүреш кал­дык­лары чыгаруга да җавап­лырак караш сорала. Район моның өчен бары ике генә полигон булуына да басым ясалды. Аларның елга башларында барлыкка килүе санкцияләнмәгән чүплек булып санала. "Калдыкларны сортларга аерып җыйнауны һаман ныклап торып оештыра алмыйбыз. Күпме акча түктек, ә контейнерлар барысы бер иш булып кала",- диде башкарма комитет җитәкчесе. Бәлки бу мәсьәлә 2018 елдан соң уңай хәл ителә башлар. Узган елның сен­тябрендә ТР Министрлар Кабинеты Татарстан Рес­публикасында калдыклар белән, шул исәптән каты коммуналь калдыклар бе­лән эш итү өлкәсендә территориаль схеманы раслау турында карар кабул итте бит. Шул нигездә ТБО (каты көнкүреш калдык­лары) ТКОга (каты коммуналь калдыклар) әйләнеп, якын киләчәктә аларны чыгару ике региональ операторга йөкләнәчәк. Бу уңайдан Татарстан икегә бүленә. Операторларның Көнбатыш зонасына Сабадан тыш тагын 21 муниципаль район керәчәк. Әлеге муниципаль бе­рәм­лекләрдә ел саен 1 миллион тоннадан артык чүп барлыкка килә, шуның 17510 тоннасын безнең район бирә. Татарстанда аларны юк итү өчен чүп яндыру заводы, Казанда - ике, Югары Осланда, Чирмешәндә һәм Алабугада муниципальара каты коммуналь калдыклар полигоннары төзү планлаштырыла. Башка районнарда чүп төяү станцияләре генә булачак. Без әлегә чүп җыеп, аларны күмү белән генә шөгыльләнәбез, ди­яргә була. Алга таба җи­тештерү һәм көнкүреш кал­дыкларын төрен-төргә ае­рып, аларны икенче чимал буларак файдалануга җитди керешеләчәк.

Торак пунктларын коммуналь калдыклардан арын­­дыруга региональ опе­­раторлар ныклап алын­­са, билгеле, тарифлар үсәр­гә мөмкин. Алай була күр­мәсен иде. Киңәшмәдә ха­лыктан үзара салым җый­­нап төзелгән балалар мәйданчыкларына сак караш кирәклеге турында да сүз булды.