Эшле итүчеләр - беренчелектә

Халыкны эш белән тәэмин итү үзәге бу көннәрдә шатлыклы вакыйгалар белән яши.

Беренчедән, коллектив яңа бинага күчерелде. Үзәкнең яңа бинасы ха­лыкка уңайлы булудан тыш, дивардагы мәгъ­лүмати хәбәрләр күп ке­нә яңалыклар белән дә таныштыра. Икенчедән, уз­ган елгы хезмәт нәти­җәләре буенча 45 район арасында безнекеләр 1 урынга чыккан. Беренчелекне алган көннәрендә үзәк җитәкчесе Данис Габдерахмановтан уңыш­ларының серен белдек.

-2014 елда без еллык нәтиҗәләр буенча 4 урынга калган идек. Шуннан һәр юнәлеш буенча анализ ясадык. Бер ел эчендә эш­чәнлегебезне арттырып, 2015 елда еллык хезмәт нәтиҗәләре буенча беренчелеккә чык­тык. 2016 елда да шушы дәрәҗәне саклап кала алдык, моның өчен мин үземнең коллективка рәхмәтле. Рейтингны мәскәү белгечләре 15 төрдәге программаның үтәлешен исәпкә алып билгели. Беренчелектә без - 69 балл, икенче урында Азнакай 145 балл бе­лән бәяләнгән. Беренче-икенче урындагы аерма да эшчәнлегебезнең нинди масштабта оешканлыгын күрсәтә. Зур бурычларыбызның берсе - җәйге каникулда балаларны эшкә урнаштыру. Бу юнәлешне укучыларны акчалы итү генә түгел, хезмәт тәрбиясе дип тә карарга кирәк. Район башлыгы Рәис Миңнеханов тарафыннан таләп куелып, оешмалар да бу эшкә алынмаса, үзебез генә башкарып чыга алмас идек. Быел да моның буенча эшне башладык. Оешма җитәкчеләре җәй көне ничә укучыны эшкә алачагын инде белә. Районда 14-18 яшьлек 1033 бала бар. Физик яктан кимчелеге, медицина рөх­сәт итмәгән, килешү ни­гезендә өлкәннәрне тәрбияләүче һәм имтихан бирәсе 9-11 сыйныф укучыларын чигергәннән соң, 700гә якын бала җәй дәвамында эшкә урнаштырылачак.

Эшсез калып, үзәктә исәптә торучылар һәм 3 яшькә кадәр бала тәрбияләп декрет ялында утыручы әниләрне укытабыз. Шушы көннәрдә визажист һәм массаж буенча укыганнар имтихан бирә. Эштән кыскартылучылар өчен агач эшкәртү, каравылчы, газ операторы белгечлегенә укытулар оештырылды. Укулар дәүләт ярдәме белән түләүсез оеш­тырыла. Яңа бинага күчкәч бу уңайдан да мөмкинлекләребез арт­ты. Укыту өчен хәзер махсус класс бүлмәсе бар. Узган ел бала ялында утыручы 10 яшь әни массаж ясаучы, 11 әни кондитер белгечлеге алды. Эшсезлек буенча массажистлыкка - 10, кран манипуляторы машинистына - 15, котельная операторына 60 кеше укыды. Шулай ук лифтер, экскаватор машинисты, сатучы, шәхси каравылчы, "д", "е" категорияле автомобиль йөртүчеләр һәм башка төр һөнәрләр буенча укытулар оештырылды. Барлыгы 141 кеше яңа һөнәр үзләштерде. Бу юнәлештә агымдагы елда да эш дәвам итә.

Болар барысы да халыкны эш белән тәэмин итү үзәгенең эш­чәнлек рейтингында исәпкә алынган. Әлеге коллектив тырышлыгы белән Саба районы юкка гына беренчелеккә күтәрелмәгән. Бире­дәгеләрнең тынгысызлыгы, эш буенча ярдәм сорап килгән һәммә кешегә игътибарлы булулары күп кенә эшсезләрне эшле, һөнәрле итә дә инде. Рейтингны әнә шул күрсәткечләр күтәрә.