Кыр эшләре оешкан төстә бара: район буенча барлык чәчеләсе мәй­данның 66 процентында эш башкарылган

Кыр эшләре "Симет", "Болгар", "Урта Саба", "Шытсу" җәмгыятьләрендә, "Саба" җәмгыятенең Сатыш, Тимершык, Мичән бригадаларында, "Мөхәммәтшин" крестьян-фермер хуҗалыгында, "Нырты" авыл хуҗалыгы предприятиесендә оешкан төстә бара.

Башка хуҗалыклар да калышмаска тырыша. Алдагы көннәрдә булган яңгырлар, түбән температура кыр эшләрендә бераз тоткарлык ясады ясавын. Әмма технологияне дөрес кулланып, сыйфатка омтылып эшләүче хуҗалыкларда бөртеклеләр күмдерелгән мәйданнарның саны артып тора. Районның сыйфат комиссиясе дә эшен дәвам итә. Кайбер хуҗалыклар кукуруз чәчү эшенә дә кереште. Район буенча барлыгы 675 гектар мәйданда бөртеккә кукуруз чәчелгән.

-Кукурузның тирәнлеге норма буенча 7-8 сантиметр булу отышлы санала. Әмма быел, җир температурасы салкын булганлыктан 4-5 сантиметр тирәнлек тә җитә. Туфракта 8 градус җылылык булу шарт, - дип киңәш итте комиссия әгъзалары кукуруз чәчү барган кырларны күзәткәндә.

"Арпаны чәчүне төгәл­ләдек, 200 гектар планлаштырган идек. Катнашазык 100 гектарда үстереләчәк, кереп булмый торган дымлы урында 10 гектар чамасы калды. 14 майда кукуруз чәчүгә чыктык, планда 240 гектар. Уҗымнарның торышын яхшы дип бәяләдек", - дип каршылады безне "Саба" җәмгыятенең Явлаштау бригадасы агрономы Алмаз Фазлыев.

Сыйфат комиссиясе 15 майда "Явлаштау", "Иген­че", "Курсабаш" җәм­гыять­ләрендә, "Әх­мә­тов"­ крестьян-фермер­ ху­­җа­­лыгында булды. Һәр авыл­да төрле әттәхият ди­­гәндәй, кайбер ху­җалыкларда чәчү тө­гәл­ләнгән кырлар йомырка тәгәрәтерлек булса, кантарлы басулар да очрады. Мондый кырлар аеруча "Әхмәтов" крестьян-фермер хуҗалыгында күзә­телде. Һава торышына гына сылтарга ярамый, технологияне бозып эш­ләү нәтиҗәсе бу, дигән фикергә килде белгечләр. Хуҗалык белгечләре тарафыннан контроль юк. Булган урында да түбән дәрәҗәдә оештырылган. Шулай булмаса кыр башында күмдерелми калган орлыклар күзгә күренеп тормас иде. Чәчү эшләренә салкын караш "Курсабаш" хуҗалыгында да күзәтелде. Чәчү төгәлләнгән кырларда бәлки бар да камил башкарылгандыр. Басуны алдап булмый бит. Һәрхәлдә хуҗалык белгечләре, механизаторлар моны аңлап эш итәдер, дип ышанасы килә. Әмма комиссия килгән кырларда хәлләр әлләни куандырмады. Борчак чәчелгән кыр башында күмдерелми калган орлыкларны күр­гәч механизатор һәм алар­­ның ярдәмчеләренә эш­­ләреннән бүленеп, кул­­­­ларына ачкыч алып, чәч­­­кеч­­­ләрне кабат көйләр­гә туры килде. Шул ук вакытта орлык­ларның да тиешле кондициягә җиткереп эшкәртелмәгәнлеге күре­нә: чәчүлек борчаклар ярыл­ган. Өстәвенә бурхус бөҗәге дә зарарлаган.

АПК һәм барлык тармак профсоюзларының район комитеты рәисе Дания Галимуллина агропас­порт­­ларның меха­ни­затор­ларның үзендә бу­луын шарт итеп куя. Техникада йөргәндә таушала, май тия, буяла, дигән җавапка да, җир эшкәрткән, яки чәчкән өчен билгене агроном кабинетка алып кайтып түгел, кырның үзен­­дә механизатор бе­лән бер­лектә куярга ти­е­ш­, дип катгый фикерен бел­дерде хуҗалыкларда йөр­­гәндә.

Хуҗалык белгечләренә һәм җитәкчеләренә сыйфатны бозмыйча, чәчү темпын арттыру бурычы куелды.

Район буенча 15 майга барлык чәчеләсе мәй­данның 66 процентында эш башкарылган. 7244 гек­тарда арпа (план 7500), 3000 гектарда бодай (5000) чәчелгән. Борчак, солы чәчеләсе мәйданнарда эш төгәлләнгән.

Зәмирә Сәмигуллина.