Чит ил паспортын яшәү урыны буенча өч ай эчендә рәсмиләштереп булачак

(Казан, 14 ноябрь, «Татар-информ»). Чит ил паспортын теркәлү урыны түгел, ә яшәү урыны буенча рәсмиләштерүче россиялеләр өчен әлеге документны әзерләү вакыты дүрт айдан өч айга кадәр киметеләчәк. Дәүләт Думасына тиешле канун проектын тапшыру турындагы карар РФ Хөкүмәте сайтында дөнья күргән, дип хәбәр итә ТАСС агентлыгы.

Бу шулай ук биометрик чит ил паспортларына да кагыла. Әлеге документны теркәлү урыны буенча алучылар өчен паспортны рәсмиләштерү вакыты элеккечә (бер ай) кала.

РФ Премьер-министры Дмитрий Медведев 9 ноябрьдә Хөкүмәт утырышында ясаган чыгышында билгеләп үткәнчә, Эчке эшләр министрлыгы чит ил паспортын яшәү урыны буенча рәсмиләштерү вакытын алга таба тагын да киметү юнәлешендә эшли.

http://tatar-inform.tatar