Гәбдрәхим шалтыратты. "Айсылу Габдинова белән бергә икәнсез, шул сорауларны ачыклар өчен, "Курай" радиосына килә алмассызмы икән?" - ди. Кызык булып китте. Мин әйтәм: "Кем әйтте?". "Бик ышанычлы чыганак, кем икәнен әйтмим", - дип, Гәбдрәхим эчкә корт кертте. Башта бармаска дигән уй да бар иде дә, тик соңрак ризалаштым.

Айсылу Гадбинованы да алып килергә тырышырмын, дидем. Кызыксынучан Гәбдрәхимнең үзенә дә берничә сорауны бирергә өлгердем.

- Гәбдрәхим, син кайда эшлисең хәзер?
- "Акчарлак" газетасында. Журналист дип яз.

- Хезмәт хакы күпме аласың?
- Вахит Имамовның хезмәт хакы кадәр - 50 меңнәр тирәсе.

- Мин сине "Курай" радиосында эшли дип беләм бит...
- Анда инде мин 18 ел алып баручы. Ди-джей диләр бугай хәзер.

- Намаз укыйсыңмы син? Нәселегез дини бит.
- Укыйм.

- Син дә ялгыз дип беләм...
- Нишләп ялгыз?! Мин бит өйләнгән!

- Хатыныңның исеме ничек?
- Лилия.

- Балагыз бармы?
- Минем кыз зур бит инде. Банкта эшли.

- Хатының белән бергә яшисезме?
- Юк, аерым торабыз. Хәзер андый мөмкинчелегебез бар.

- Бүген көнең ничек үтте соң?
- Кайвакыт минем беркемне күрмичә өйдә генә утырасым килә.Бүген шундый көнем иде.Тик материал укырга кирәк дип "Акчарлак"кка чакырдылар.