Коточкыч фаҗигадә һәлак булганнарның гәүдә өлешләре экспертизага китерелде

ТР Сәламәтлек саклау министры Гадел Вафин Казандагы авиаһәлакәттә вафат булганнарның туганнары белән әңгәмә барышында хәбәр иткәнчә, беренче мәет калдыклары экспертизага инде китерелгән.
"Хәзер төп бурыч - әлеге гәүдә өлешләренең кемнеке икәнлеген ачыклау", - дип аңлатты министр. Ул шулай ук калган мәет калдыкларын тиңләштерү күпкә катлаулырак булачагын белдерде.
Г. Вафин тикшерү процедурасының ике атнага һәм аннан да озаккарак сузылырга мөмкинлеген билгеләп узды. Тикшеренү нәтиҗәләре буенча мәрхүмнәрнең туганнары белән телефон аша элемтәгә керәчәкләр.