Саба – кар әсирлегендә: «Өчәр метрга кадәр салган урыннары бар»,-диләр юлларны чистартучылар

Тик кенә торганда капланды томанга бар һава;

Кар оча, кар себрелә, кар

котрына һәм кар ява.

Әгәр Тукайга ышансак, узган  яллардагы шикелле бураннар элек тә булган. Әмма соңгы  елларда табигатьнең болай ук дулаганы юк иде әле.

Олырак яшьтәгеләр гыйнварда быелгыдай кар көртләре 1975  елда барлыкка килгәнен әй­тә. Күрәсең, һава торышының без аңлап бетермәгән цикллары бардыр. Кыскасы,  Татарс­тан буйлап узган актив циклон нәтиҗәсендә айлык явым-төшем нормасы өч  көндә үтәлде (46 мм.). (Бу  – бер  квадрат метрдагы  карны  эретсәң 4,6 сантиметр  биеклектәге су барлыкка  килә дигән   сүз).

Буран әлегә тынды. Хәзер Сабада күптармаклы җитештерү предприятиесе урамнарны кар­ чыгару техникасы белән  ки­ңәй­тә. Күпчелек шәхси йортлардан  юлга кәҗә сукмагы гына салынган килеш.  Кичә байтак тро­туарлар чистартылмаган  иде әле.  “Район  үзәгендә 90  урам бар. Гомуми озынлыгы 93,7 километрга җитә. Башта үзәк урамнар чистартыла. Яңа барлыкка килгән 5-6 йортлы урамнарны да ачарга кирәк.  Коммуналь хуҗалыкка баш­ка оешмалар техникасы да булыша”, – диде Саба шәһәр җир­леге башкарма   комитеты җи­тәкчесе Рашат Гыйльманов.

Карны полигонга урнаштырып  бару  да  күп хезмәт  сорый. Бушатырга урын  ясарга, гел эттереп торырга   кирәк. Рейсларның исәбен  алып торучы Фәрит Мө­барәкшинның әйтүенә  кара­ганда, Сабаны  кардан арынды­руга Тимершыктан шәхси эш­­мәкәр Эльмир Ибраһимов “КамАЗ”ларының да  өлеше  керә. Эльмир үзе төяп тора. Инде 2-3 сәгать эчендә “КамАЗ”лары ун­­лап рейс ясарга өлгергән. “Са­ба Цинк” җәмгыятенең роторлы тракторын С.Сәйдәшев  урамын­да очраттык. “Карны еракка очы­ра инде бу. Бакчаларына  ук аттырганга сүз әйтүчеләр  юк. Яз  кө­не эри бит ул”,– ди тракторчы Фидаил Зиннәтов.

Атна башында кар стихиясенә каршы коммуналь хуҗалыкның 11 техникасы, “Рамазан”,  “Агрохимсервис” җәмгыятьләре, “Тат­ав­тодор”ның Саба филиалы ма­­шина-тракторлары көрәште.  “Баш­карма комитет җитәкчесе Ма­рат Рашатович оештыруында байтак оешмалардан техника җәлеп ителде. Кары да күп, себереп тутырган  җирләрдә аның калынлыгы 1,5 метрдан артык, 1-2 көндә генә җиңә торган түгел. Кар вакытында чистартылмаган урам-тыкрыклардагы йортларда яшәүчеләрдән, тротуарлардан йөрүче  җәяүлеләрдән   гафу  үтенәбез”, –ди предприятие директоры  урынбасары  Айрат Шаһвәлиев.

Шәмәрдәндәге хәлләрне “Шеморданстрой” җәмгыятенең баш инженеры Илсур Таиповтан бе­лештек. “Хәзер урамнардан ни­гездә чыгарылып бетте диярлек. Коммуналь хуҗалыкның һәм баш­ка оешмаларның  барысы 14 техникасы эшләде.  Хәзер  Мичәнбашны  ачабыз. Карның өчәр метрга  кадәр  салган урыннары бар”, – диде  ул.  Халык исә моңа авыл читләрендә буран ышыклау   полосалары булмауны  сәбәп итә. Шуңа   күрә  кырдагы карны урамнарга  себереп  кертә. 

Татарстан гидрометео үзәге ат­на  ахырына таба,  салкыннар  чигенеп, кабат кар  яву ихтималы хакында искәртә.