Сабада “Полиция Кыш бабае” акциясе бара

Яңа ел алдыннан - 16 декабрьдән районда "Полиция Кыш бабае" пиар-акциясе старт алды. Россия Эчке эшләр министрлыгының Саба бүлеге балигъ булмаганнар эше буенча инспекциясе хезмәткәрләре социаль имин булмаган, аз тәэмин ителгән гаиләләрдәге балаларга бүләкләр өләшә. Гомумән, бу акциядә мохтаҗларга ярдәм итәргә теләге булган һәркем катнаша ала. Балалар киемнәре, тәм-томнар, уенчыклар һәм башкаларны балигъ булмаганнар эшләре буенча бүлекчәгә алып килергә була. Акция барышында әлеге җыелган Яңа ел бүләкләре аз керемле күп балалы гаиләләргә, шулай ук балалар йортларында, социаль приютларда тәрбияләнүчеләргә тапшырылачак.