Татарстанда 2015 елның җәенә кадәр 3 мең кеше эштән азат ителергә тиеш

2015 елның гыйнвар-май айларында, Татарстанда хезмәткәрләр штатын кыскарту белән бәйле рәвештә, 3041 кешене эштән азат итү ниятләнә, дип хәбәр итә Хезмәт, халыкны эш белән тәэмин итү һәм социаль яклау министрлыгы матбугат хезмәте.
Элек 2401 кеше эшсез калачак, дип хәбәр ителгән иде.
11 февральгә булган мәгълүматларга караганда, эш бирүчеләр инициативасы буенча 24 мең 557 кеше тулы булмаган эш көне һәм тулы булмаган атна режимында эшләгән. Эш белән тәэмин итүчеләр гаебе белән 454 кеше эшсез торган, 147 кеше үз хисабына ялда булган.

Татар-Информ.