Татарстанда кемнәр санаторийларда бушлай дәвалана ала?

Шифаханәдә бушлай  дәвалану социаль хезмәтләрнең федераль җыелмасы кысаларында медицина күрсәткечләре буенча бирелә.

Кемнең бушлай юлламага хокукы бар:

- сугышчан хәрәкәтләр инвалидлары;

- Бөек Ватан сугышында катнашучылар;

- Бөек Ватан сугышы елларында хәрби объектларда хезмәт иткән яисә эшләгән гражданнар;

 -сугышчан хәрәкәтләр һәм локаль конфликтлар ветераннары;

- «Житель блокадного Ленинграда» һәм «Житель осаждённого Севастополя» таныклык ияләре;

- бурычларын үтәгәндә һәлак булган хәрби хезмәткәрләрнең һәм хәрби хәрәкәтләрдә катнашучыларның туганнары;

- инвалид кешеләр, шул исәптән сәламәтлек мөмкинлекләре чикләнгән балигъ булмаган балалар;

-Чернобыль АЭСындагы һәлакәт, шулай ук Семипалатинск полигонындагы атом-төш сынаулары нәтиҗәсендә зыян күргән затлар.

Озата баручы зат өчен юллама

18 яшькә кадәрге инвалид балага яки I төркем инвалид гражданга шифаханәдә дәвалану таләп ителгән очракта озатып йөрүчегә юллама түләүсез каралган.