ТР Кызыл китабын төзүчеләрнең берсе Валериан Гаранин вафат булган

Илебезнең иң эре зоолог-герпетологларының берсе Валериан Гаранин 97 яшендә вафат булды. Бу хакта Казан федераль университеты матбугат хезмәтендә хәбәр иттеләр.

Ул Татарстанның Кызыл китабын төзүчеләрнең һәм мөхәррирләрнең берсе, шулай ук Идел-Кама тыюлыгы территориясендә фәнни тикшеренүләрне оештыручы була.

Гаранинның фәнни-педагогик эшчәнлеге Казан федераль университеты белән тыгыз бәйләнгән була. 1952 елда ул Биология-туфрак факультетын тәмамлый, аннары СССР Фәннәр академиясенең Казан филиалы Казан биология институтында эшли, лаборанттан өлкән фәнни хезмәткәргә кадәр юл үтә. 1970 елдан КФУның Биология-туфрак факультетында педагогик эш алып бара: доцент, табигатьне саклау кафедрасы мөдире, декан урынбасары була.

Валериан Ивановичның фәнни кызыксынулары хайваннар экологиясен, герпетологияне, табигатьне саклауны һәм фән тарихын үз эченә алган. Ул 350дән артык басма, шул исәптән 30 монография һәм китап авторы, алар арасында «Идел-Кама краеның җир-су хайваннары һәм сөйрәлүчеләре» һәм «Идел-Кама тыюлыгы»бар.

Гаранин Халыкара педагогика академиясенең мөхбир әгъзасы, Бөтенроссия табигатьне саклау җәмгыятенең һәм А.М. Никольский исемендәге Россия герпетология җәмгыятенең мактаулы әгъзасы була.

Аның фәнни һәм педагогик эшчәнлеге күп санлы бүләкләр белән билгеләп үтелә, шул исәптән «Фидакарь хезмәт өчен» (1970), «хезмәт батырлыгы өчен» (1979), «хезмәт ветераны» (1984), «Казанның 1000 еллыгы истәлегенә» (2005) медальләре, «казанышлар өчен» мактаулы медале (Идел-Кама дәүләт табигый биосфера тыюлыгы, 2010), «казанышлар өчен» мактау билгесе. «Россия Федерациясе мәгариф өлкәсенең мактаулы хезмәткәре» мактаулы исеменә (2018), "Татарстан Республикасының атказанган экологы" мактаулы исеменә күкрәк билгесе (2018), КФУ ректорының Мактау грамотасына (2023).

Галим белән хушлашу якшәмбе көнне, 29 мартта, 11:00 сәгатьтә Казан федераль университетының мәрмәр залында (2-нче корпус, Кремль ур., 35) була.

Татар-информ