Уфада Габдулла Тукайга һәйкәл куелачак

Уфада күренекле татар шагыйре Габдулла Тукайга һәйкәл куелачак. Бу хакта “Татар-информ” хәбәрчесенә Татарстанның халык шагыйре Роберт Миңнуллин хәбәр итте.

“Һәйкәл Тукайның туган көненә кадәр куелачак дигән сүзләр бар, әмма төгәл мәгълүмат әлегә билгесез. Габдулла Тукайга һәйкәл кую мәсьәләсен “Кызыл таң” газетасы 2010 елда ук күтәргән иде. Мин дә 2011 елда ук "Кызыл таң"да шул турыда язып чыккан идем”, - диде ул.

“Һәйкәлнең кайда куелачагы билгеле түгел. “Нур” театры каршысында дигән вариант та булган иде, ләкин әлегә бәхәсләр бара. Шәхсән миңа бу вариант ошый”, - дип сөйләде Роберт Миңнуллин.

Габдулла Тукайның бюстын ясау өчен конкурс игълан иткән булганнар. “Бюстның авторын белмим, әмма мин аны ошаттым: Тукайга охшаган, тере, җанлы килеп чыккан. Миңа калса, бюст чын шагыйрьләрчә, Уфаны бизәп торачак”, - диде Роберт Миңнуллин.
 

Фото: Рамиль Гали/архив

https://tatar-inform.tatar