"Ярсыган җинаятьче белән эш иткәндә психолог булырга кирәк"

Бу хезмәтнең 514нче тоткарлау төркеменең өлкәне - өлкән сержант Айрат Хакимҗанов - бүгенге героебыз. Ведомстводан тыш сак экипажының хезмәте маршрут юлында уза. Көнләшерлек профессиональ, махсус һәм техник әзерлеккә ия Айрат. Ведомстводан тыш сак хезмәте алдында куелган бурычларны намус белән һәм оператив үти. 

 

Криминаль обстановка гадәттә бәйрәм көннәрендә кискенләшүен ассызыклап үтә ул. Гади шартларда нормаль булган кешеләр дә, берничә көн рәттән спиртлы эчемлек кулланып, адәм кыяфәтен югалтулары ихтимал. Исерек килеш мөнәсәбәтләр ачыклау аркасында хулиганлык кылу, сәламәтлеккә зыян салу – алдан уйламыйча, кинәт килеп чыга торган фактлар. Бәйрәмнәр якынлаша төшә, кибетләрдә гадәттә урлашулар саны күбәя. Узган елны мәсәлән, Яңа ел төнен бер экипажлары ... кибеткә урлашырга кергән Һиндстан студентлары белән бергә каршыларга мәҗбүр булган. Төнге 10нарда Казанда Җиңү проспектындагы супермаркетларның берсеннән тревога сигналы алынгач, тоткарлау төркеме бирегә юл тота. Ерак илдән Казанга югары белем алырга килгән яшьләрне рюкзак тутырып азык-төлек, тәмнүшкәләр алып чыгып барганда тоткарлаганнар. Барысын да ачыкланганчы иртәнге дүрт җиткән була. Берничә чит ил кешесенә карата административ эш башлыйлар ул вакытта. 

         

Отары бистәсендә кеше машинасын куып алып киткән пенсионер ир “кайнар эз”ләрдән тоткарланды. Машина җылынган арада ачкычны калдырып өйгә кереп киткән хуҗа чак милкеннән колак кага язган. Бер исерек ир-ат форсаттан файдаланып калмакчы була. Кеше машинасына кереп утыргач, ерак китә алмый, шулай да. Машинаны шул ук урам буенча бераз читтәрәк табып алалар. Куып алып китүче исә, берни булмагандай, машинаны ташлап китеп барган. Аның эзенә төшеп, тоткарлыйлар. Кибеткә генә барып кайтмакчы идем, дип акланса да, хокук бозучыга карата Җинаять Кодексының 166нчы “Угон” маддәсе буенча җинаять эше кузгатылды. ВАЗ-2114 хуҗасына кайтарып бирелде. 

 

 “Росгвардиянең ведомстводан тыш сак хезмәте патруле эшендә киләсе минутта ни буласын белмисең, чираттагы ишек артында кем торганын алдан күрәзәләп булмый. Тоткарлау вакытында каршылык күрсәтүчеләр дә бихисап,”- дип сөйли өлкән сержант Хакимҗанов. Мондый очракта самбо приемнарын белү генә җитми - психолог булырга да кирәк. Бигрәк тә ярсыган җинаятьче белән эш иткәндә. Районда яшәүчеләр арасында исерек килеш пычак куллану очраклары да еш кабатлана. Мондый “канлы” очракларның күп өлешен исерек халәттә барлыкка килә. Кичерә алмаслык ярсу буш урында туа. Талашу-сугышу-үтереш сәбәпләре, гадәттә, өч тиенгә дә тормый, кеше үз аңына килгәндә, соң була инде...” Якыннарыгызны, бер-берегезне саклагыз!