5 декабрь -волонтерлар көне

автор, 5 декабрь 2025 - 08:18

898

Хәзер тормышыбызны алардан башка күз алдына да китереп булмый

Ел саен 5 декабрьдә Россиядә Президентының 2017 елның 27 ноябрендәге 572 номерлы Указы нигезендә Волонтерлар көне билгеләп үтелә.

Асылда волонтерлар хәрәкәте гражданнарның тәүләүсез нигездә социаль яктан мөһим булган проектларны тормышка ашыруда ярдәм итүенә нигезләнә. Бу хәрәкәт тормышның төрле өлкәләрен үз эченә ала һәм гражданлык җәмгыятенең мөһим өлеше булып тора. Соңгы елда районыбызда яшәүчеләрнең барысы да волонтерлар булды. Аларны махсус хәрби операция катнашучы райондашларыбызга ярдәм итү теләге берләштерде. Һәркем бу игелекле эшкә үз өлешен кертергә омтыла. Авылларда оештырылган штабларда аларның тырышлыгы белән гуманитар ярдәм җыела, волонтерлар солдатлар өчен маскировка челтәрләрен үрүдә, окоп шәмнәрен ясауда эшлиләр, егетләребезгә туган йорт җылысын һәм сәламнәрен җиткергән ризыклар, җылы киемнәр әзерләп озатыла. Барлык волонтерларга игелекле йөрәкләре өчен чын күңелдән рәхмәт белдерәсебез килә.

Россиядә волонтерлык 2000 еллар башыннан актив үсә, ул вакытта мохтаҗларга ярдәм итүгә юнәлтелгән күпсанлы иҗтимагый оешмалар һәм инициативалар төзелә. Россиядә волонтерлык хәрәкәте иң масштаблы эш күрсәткән вакыйгаларның берсе – 2014 елда Сочида Олимпия уеннары, анда меңләгән кеше волонтер буларак катнашкан.

Волотерлар да эшчәнлек төре буенча төрләргә бүленә икән:

Мәдәният волонтерлыгы

Бөтен ил буенча 380 меңнән артык волонтер мәдәният һәм сәнгать өлкәсен үстерүгә ярдәм итәргә әзер.

Социаль волонтерлык

Ятим балалар, ялгыз картлар, инвалидлар, авыр хәлгә калган кешеләр белән эшлиләр. Психологик һәм социаль ярдәм күрсәтәләр.

Экологик волонтерлык

Бу киң юнәлештәге волонтерлар табигатькә ярдәм итә – чүпләрне җыя, өмәләр һәм акцияләр үткәрә, агачлар утырта, җәнлекләрне яклауга өнди. Волонтер командаларын еш кына тыюлыкларда эшләү өчен җәлеп итәләр.

Медицина волонтерлыгы

Гадәттә, профильле көллият һәм югары уку йортлары студентлары медицина волонтеры була. Психологлар еш кына шифаханәләрдә түләүсез эшли, аниматорлар кечкенә пациентлар өчен бәйрәмнәр оештыра. Канга донорлык – шулай ук волонтерлык эшчәнлеге.

Патриотик волонтерлык

Активистлар Бөек Ватан сугышы истәлекләрен сакларга ярдәм итә. Алар ветераннарны карый, сугышчыларның каберләрен эзли, хәбәрсез югалганнарның исемнәрен торгызу өстендә эшли, патриотик акцияләр үткәрә.