“Аргамак” та чаба арыган ат та, монда ярыш азарты тарта

    Узган шимбә-якшәмбе көннәрендә Байлар Сабасының “Аргамак” картодромы кабат шаулады. Бераз булып  алган тынлыктан биредә  карт автомобильләрендә Бөтенроссия ярышлары  дәвам итте. Бу юлы инде “Аргамак” призына. Узышларда илнең 27  субъектыннан, 7  яшьлек балалардан  алып,  олыларга кадәр, 157 спортчы катнашты. Ачылыш вакытында район башлыгы  урынбасары  Расих Закирҗанов  әйткәнчә, монысы да  алда көтелгән Россия  чемпионаты/беренчелегенә прелюдия генә. Катнашучылар спорт директоры  Алексей  Бортников та хәер-фатихасын  бирде. Картингчыларга уңай  һава шартларына теләсә дә, табигать үзенчә хәл итте.  Әмма  яңгыр карт  спортына  киртә түгел  икән. Шиналарны гына  алыштырасы  да,  ярышны дәвам итәсе. Трассада су тамчылары тузан булып   күтәрелә, картлар бер-берсенә терәлеп диярлек бара. Ничек күзләр дә күрәдер дә, кайсы мизгелдә тормозны эшкә  җигәргә  өлгерәләрдер, шаккаткыч.  Трассадан читкә  чыгып китсәң, сиңа беркем булышырга тиеш  түгел. Сүнгән двигательне  кабызып  карарга мөмкинлек бер генә тапкыр бирелә. Финишка җитә алмаучылар хәйран булды ярышта. Кызганыч, шундый экстрим тамашаны караучылар яшь  картингчыларның туганнары, әти-әниләре генә иде. Ераклардан килүчеләр үзләреннән  электр самокатларын, гироскутерларны  да  калдырмаганнар. Тегендә-монда  шулар белән генә хәрәкәтләнәләр. Әлбәттә, үзебезнең “Торнадо” спорт клубына элек йөргәннәрнең дә һәм хәзер шөгыльләнүчеләрнең дә күбесе шунда иде.  Сигез  яшеннән “Мини” класслы  картка утырган, хәзер 6нчы  сыйныфка барачак Рәсим Йосыфҗанов та шунда. Аның инде берничә призлы  урыны бар.“Башта  куркыныч  иде. Аннары әкренләп ияләндем. Тора-бара кызу йөрергә дә өйрәндем. Лесхоз картодромында Татарстан  чемпионатында “Стриж” классында 3нче  урынны  алдым. Аннары “Пилот”ка  утырттылар. Бу  яңгырны әйтәсезме?  Әйе,  яуса да, йөрибез. Андый  чакта газга  артык басарга  ярамый.  Колония белән барсаң,  бер нәрсә  дә күренми. Сак булырга  кирәк”,– диде Рәсим.  

 Сабалылар ярышта безнең районнан бердәнбер  катнашучы  Илнар Галимов өчен җан аттылар. Ул инде “Торнадо” клубына  кечкенәдән абыйсына ияреп  килгән һәм  спортның экстремаль төре  аңа ошап киткән. Күп  кенә  уңышлары бар,  Татарстан   күләмендәге  чемпионатларда призлы  урыннар   алган. Кызганыч, ул бу юлы классификацияләнә  алмады.  Әмма кәефсезләнергә  урын юк. Спорт – ул җиңүләр һәм җиңелүләр генә түгел,  сәламәтлек, адреналин чыганагы.

   Шулай итеп, Сабада беренче узышлар уикенды  узып та китте  һәм безгә аның нәтиҗәләре белән таныштырырга гына кала. Башта пьедесталга “Микро” классында ярышкан барлык яшь пилотларны чакырдылар, ә Кубокны Мәскәүдән   килгән  Тимофей Степновка (1нче  урын) тапшырдылар. “Мини” классында подиумга кабат  Лев Хованский (Владивосток) күтәрелде. Ул узган атнада “Ротакс Макс” сериясен дә откан  иде.   “Супер Мини”, “OK-J2”, “OK”, “KZ2”, “KZ2 MASTERS” классларында Макс Фельде (Санкт-Петербург), Прохор Солуковцев (Мәскәү), Семён Родин (Свердловск өлкәсе), Роман Шарапов (Мәскәү өлкәсе),  Тимур Тимерҗанов (Татарстан) җиңде.

Команда  зачетында 399 очко белән Түбән Новгород өлкәсенең "Итеко Рейсинг” спорт клубы  картингчылары  җиңү  яулады. Алда – 2025 ел җәенең  соңгы  узышлары. Чемпионатка барысы да әзерләнә.

 Фәнил Мәүлетов.

Рәсим  Йосыфҗанов