Бер фото тарихы

  Район газетасының 95 еллыгы уңаеннан кайбер тарихи фотоматериаллар белән  уртаклашырга уйладым. 1960 ел. Миңа 7 яшь. Әти бишекле мотоциклына утыртып, Эзмә мәктәбенә алып китте. Аннары Сабага кайтып, район шагыйре Нурислам Зиннуров өенә кердек. Фотога төштек. Әлеге вакыйга турында якташыбыз, язучы Мәгъсум Хуҗинның “Азат хатын” журналында (1990 ел, апрель саны) чыккан “Көрендедә чәчәк үсә” кыйссасыннан  өзек  китерәм: “...Байлар Сабасына көзен  килделәр алар. Хәсән Туфан, Сибгать Хәким, Нәби Дәүли. Көндез мәктәптә укучылар белән очраштылар. Юкмыш бабай малае турында Хәсән абыйның үзе сөйләгәнен ишет­тек. Район газетасы ре­дак­­циясендә әдәби тү­гәрәк­кә йөрүчеләрнең ­кул­ъ­­­­яз­­­­­маларын тикшерделәр, әдә­­­бият сөю­челәре белән фо­то­га төш­те­ләр. Кичен  культура йортында зур оч­рашу  бул­ды. Аннары без алар­ны кеч­кенә мәҗлескә чакырдык. Анда гомере буена  Сабага тугрылыклы балалар  язучысы Газиз Нәбиуллин, район газетасы редакторы урынбасары Габделбәр  Мәннанов, Сабаның фотографы Хәбибрахман Кә­ри­мов бар иде“.

  Инде бу санда бирелгән фотога килсәк, сез 1960 елда Сабага килгән олпат язучылар Сибгать Хәким (алдагы рәттә, сулдан 2нче), Нәби Дәүли (сулдан 3нче) һәм Хәсән Туфанны (уңнан 1нче) күрерсез. Бу фото Нурислам  Зиннуров (алгы рәттә, уңнан 2нче) яшәгән  йортның ишегалдында төшерелгән. Шул көнне Казан әдипләре тарафыннан район газетасы каршында “Мишә дулкыннары” әдәби берләшмәсенә нигез салына. Ул елларда Нәби Дәүлинең (1910-1986) “Яшәү белән үлем арасында” дигән әсәрен укымаган кеше аз булгандыр. Ә репрессия  корбаны Хәсән Туфанның (1900-1981) “Кай­сы­гызның кулы  җы­лы, бәй­лисе бар йөрәкне” ди­гән ши­гырь юллары да канатлы сүзгә  әверелде. Фотоның арт­тагы рәтендә  “Мишә дулкын­нары” әдәби берләшмәсе уты­­рышына килүчеләрне та­ну­чылар булыр дип уйлыйм.  “Әй­­­­тик, уңнан өченче  Мәгъ­сум Хуҗин республика  күләмендә әдәби мәйданга чыгып, югары күтәрелгән шәхес.

  Әти гомерендәге бөтен буш вакытын фотография сер­ләрен өйрәнүгә багышлады. Редакция коллективы белән бик дус иде. Берара  фотограф вазифасында да эшләп алды.  Типография директоры булды. Күпчелек фоторәсемнәре та­ра­лып бет­сә дә, район һәм  газета тарихы белән бәй­ле  мизгелләр әле исән. Бәлки алары белән дә газета укучыларны таныштыру мөм­кинлеге килеп чыгар дип  уйлыйм.

Рәшит Кәримов.