Дәвалаучы һөнәренә мәхәббәт

Тормышта үз юлыңны табу булачак һөнәреңне дөрес сайлауга да бәйле. Чөнки яратып башкарган эш кенә яшәешне мәгънәле итә. Шушы  көннәрдә олы юбилеен билгеләүче  баш табиб Марат Рафаэль  улына да  мактаулы  гомер  юлы  узарга язган  булган. 

1965 елда Балык Бистәсе авылында туган егет әнисе  һөнәрен  сайлый: үзен медицина белән бәйли. 1968-1986 елларда Сабада педиатр булып  эшләгән Рәшидә Сәгыйр кызын өлкәнрәк буын   вәкилләре  яхшы   хәтерли һәм ихтирам белән искә  ала. Хәзер  ул Казанда  яши, 92нче  яше белән  бара. Ә Марат Йосыповның 1968-1979 елларда – Саба райкомында авыл хуҗалыгы буенча II секретарь, 1979-1986 елларда  башкарма комитет рәисе булган әтисе Рафаэль Вәли улын район халкы гомумән онытмый, хезмәтен зурлап  сөйли. Ул  җитәкчелек иткән чорда күп үзгәрешләр була: га­зүткәргечләр салына, юллар, мә­гариф  учреждениеләре, башка  социаль объектлар төзелә,  агач бараклардан гына торган  хастаханә биләмәсендә беренче  кирпеч би­на  сафка баса. Димәк, Марат Рафаэль  улына да  әтисе үрнәгендә карьера  ясау  мөмкинлеге булган. Әмма ул башка юлдан киткән.

–Әнием генә түгел, Мамадыш районы Түбән Шүләңгер авылында туган бабам Шәмсевәли Йосыпов та – сәламәтлек сак­лау өлкәсе кешесе, райздрав бү­леген җитәкләгән. 1940 елда Ленинградка  китеп, капитан  дә­рәҗәсендә сугышка кергән. Яра­ланган, контузия алган. 1945 елның  февралендә Кенигсбергны азат иткәндә һәлак булган. Шулай итеп, дәвалаучы һөнәренә мәхәббәт каннан  да киләдер,– ди бу хакта баш табиб.

–Ә хезмәт  юлыгыз ничек  башланып  китте?

–Институтта  ук урология белән кызыксындым. Студентларның фән­­ни  түгәрәгенә   йөрдем. Интернатура   узганнан   соң,  Рес­пуб­лика  клиник хастаханәсенең уро­логия бүлегендә табиб-уролог булып  эшләдем. Иң  күңелле  еллар  шунда  үткән. Колллектив әле дә  сагындыра. 2003 елда  хезмәт  эшчәнлегемдә үзгәрешләр  башланды. Белмәгән районнарга  чыгып  китәсе булды. Башта Аксубай үзәк хастаханәсенә сәламәтлек  саклау бүлеге начальнигы итеп  күчерделәр, бер  үк  вакытта баш табиб  вазифаларын да башкардым. Медицина персоналының  пациентларны  дәвалау процессына җаваплылыгы  артты, матди-техник база ныгыды.  2014 елда  мине Нурлат район хастаханәсенә баш табиб итеп билгеләделәр. Ә инде тагын ике  елдан  Сабага  кайттым. Ягъни биредән киткәнемә нәкъ 30  ел  вакыт  узгач.

–Сез район үзәк хастаханәсенә билгеләнгәннән  соң  узган 9 ел  эчендәге үзгәрешләрне санасак...

–Яңалыклар булып тора, вакыт үзе шуны таләп итә. Төп бинада капиталь ремонт  төгәлләнеп  ки­лә. Хәзерге  вакытта хирургия корпусының  2нче  каты  һәм азык блогы  яңартыла. Киләсе  ел­да  тудыру  бүлеге  ремонтла­начак.  Шәмәрдән участок хаста­ханәсен төзекләндерү тулысынча тәмамланды. Бу  чорда  модульле 11 ФАП төзелде һәм 4се ремонтланды. Шулай ук   Иштуганда  модульле ФАП  төзелеше һәм  Иске Икшермә табиблык   амбулаториясе ремонты башланды. Әлбәттә, бина белән генә кешеләрне дәвалап булмый,  яхшы аппаратуралар  да кирәк. Бик  зур игътибар  җиһазлар  алуга биреләчәк. Болардан тыш  министрлыкка Завод-Ныр­тыда реконструкцияләнгән бинаны  балалар  өчен тер­нәк­­ләндерү үзәге итеп  үзгәртү тәкъдиме белән чыктык. Шә­мәр­дән участок хастаханәсе ба­засында ябылган плазма  үзә­гендә Казан кан  үзәге  филиалын  ачу турында да хыял бар. Җиһазланышка   килгәндә, 2023-2024 елларда  ренгтен компьютер томографы, Сабага, Шәмәрдәнгә  рентген, шулай ук флюорография, УЗИ, ИВЛ аппаратлары, электрокардиографлар, лаборатория җи­һазлары һәм башка медицина  кирәк-яраклары  алынды. Шул  ук  вакытта  ФАПларны җиһазлау да онытылмады.

–Кан тамырлары авырулары  үзәге ачылу сезнең  өчен иң ис­тәлекле  вакыйганың берсе булачак...

–Әйе, без аны биш  ел  көттек, кәгазь-документация  белән бәйле эшләр сузылды. Башлаганны  ахы­рына җиткерергә өметләнеп то­рабыз. Үзәккә 19 табиб кына  кирәк булачак. Шуларның 10ысы невролог һәм реаниматолог. Логопед штатына  кадәр  каралган. Го­мумән, кадрлар проблема­сы хастаханәдә дә сиздерә.
Хә­­зерге  көндә поликлиника беренчел буын персонал белән тулы тәэмин ителгән. Быел эшкә 4 терапевт  кайтырга  тиеш.  Берсе – Мәскәүдә  быел институт тә­мамлаучы. Район  13 терапевтлык  участогына бүленгән.  Кадрлар мәсьәләсе хәл ителсә, без 17 участок ясамакчы булабыз. Ул  вакытта бер терапевтка туры  килгән  йөкләнеш кимеп, авыруларга   хез­мәт   күрсәтү сыйфаты  яхшырачак.

–Марат Рафаэлевич, үз иң­нә­регезгә шулкадәр җа­вап­лылык алуыгызга үкенмисезме?

–Баш табиб буларак,  дөньяны үзгәртергә мөмкин. Районыбыз баш­лыгының ярдәмен һәрдаим тоябыз.  Рәис Нургалиевич гел кызыксынып, булышам дип тора. Аңа зур рәхмәтлебез. Шуңа эшләве дә күңелле. Әгәр эш бармаса, эшләп тә нәтиҗәләр начар булса, андый уй да  килер  иде. Шөкер, эш бара, коллектив  үз бурычын  үти,  куелган планнар үтәлә. Һәр нәрсә  чагыштыруда   күренә, диләр. Башка район хастаханәләре белән  янәшә  куеп    карасак, халыкның без­гә биргән бәясе начар түгел.

–Гаиләгез белән дә таныштырсагыз  иде.

–Тормыш иптәшем Лилия  Илдус кызы белән  өч бала үстердек. Кечесе Кәрим безнең нәселдә медиклар династиясен дәвам итү­че дүртенче  буын   булачак. Ул  бы­ел Сеченов исемендәге Мәс­кәү  дәүләт медицина  уни­вер­си­тетының VI курсын тәмамлый. Олы улым белән кызым Айгөлнең үз эшләре.

–Марат Рафаэлевич, әңгәмәгез өчен бик зур рәхмәт. Эшегездә, гаиләгездә уңышлар сезгә.

Гөлназ Гарифуллина, баш табиб  урынбасары:

Татарстанның атказанган табибы Марат Рафаэлевич үзе  янына бердәм, тупланган коллектив җыйды. Бездә  табибны табиб, сестраны  сестра хөрмәт итә. Медицина этикасы һәм деонтология дигән тө­шенчәләр иң   югары дәрәҗәгә куелган. Баш табиб күп кенә инновацион тех­но­логияләр алып  кайтучы. Төрле конференцияләргә барып күп яңалыкларны күрә-ишетә һәм хастаханәдә  кулланышка  кертү турында кайгырта. Соңгы елларда хастаханәдә паллиатив кабинет, көндезге онкология  бүлеге  ачылды. “Бердәм  кардиолог” программасына  да беренчеләрдән  кушылдык.  Эндокринология үзәге булдыру турында  да  сүз бара. Марат Рафаэлевич җиңел булмаган хезмәтендә оештыру  сәләте, сабырлык күрсәтә, һәркем белән уртак тел таба белә.