Ел йомгаклары ни сөйли?

  Быел озаккарак та  сузылган  Яңа  ел  каникуллары узып китте. Бюджет учреждениеләре, аерым предприятиеләр ял ит­кәндә терлекчелек тармагында эш бер  көн дә тукталмады. Сыер савучыларның, терлек симертүчеләрнең, бозау  карау­чыларның хезмәт режимы  үзгәрмәде. Әйтик, 10 гыйнварга  бул­ган мәгълүматларга  караганда, район буенча һәр сыердан 27,8  килограмм  сөт  савылды, ә “Мөхәммәтшин”   крестьян-фермер хуҗалыгында әлеге күрсәткечне 38,2 килограммга  җит­­­­­­кер­деләр.

  Гомумән, районда  яңа  елның беренче рәсми  эш  атнасы терлекчелек тармагында 2025 ел йомгакларына багышланган  киңәшмә белән башланды. Район башлыгы Рәис Миңнеханов,  авыл хуҗалыгы һәм  азык-төлек  идарәсе начальнигы  Гафур  Хәсәншин катнашында Түбән Шытсу мәдәният йортында узган эшлекле сөйләшүгә хуҗалык җитәкчеләре, зоотехниклар, икътисадчылар  чакырылган иде. 

Идарәнең җитештерү бүлеге консультанты Илшат Нурмиев  чыгышында әйтелгәнчә, былтыр  һәр  сыердан 10573 килограмм сөт савылган, роботлаштырылган комплексларда әлеге күрсәткеч 11405 килограмм  булган. Бу – барлык җитештерелгән  продукциянең 31 проценты дигән сүз. Саву залларында эшләгән   терлекчеләр дә сынатмый. Әйтик, “Мөхәммәтшин” хуҗалыгында сыерларның продуктлылыгын – 11401, “Игенче”дә – 10767,  Арташ  фермасында 10483  килограммга  җиткергәннәр.

Район буенча тулаем  алганда 2024 елга караганда 40536 центнер (103%)  сөт  күбрәк савып алынган. “Нырты” предприятиесендә һәм “Симет” җәмгыятендә 116 процент  үсешкә ирешелгән. 

Район терлекчеләре 2025 елда 53795 центнер (105%) мөгезле эре терлек, 105259 центнер (101%) дуңгыз ите  җитештерделәр. Әле­ге тармакта “Игенче” җәм­гыяте нәтиҗәле эшли (7954 ц.). Җитештерү  күләме ягыннан 2нче  урында торган “Шытсу” пред­приятиесендә бу күрсәткеч 4575 центнер тәшкил итә.

  Сыерлардан һәм таналардан барысы 14304, 2024  елга карата 68гә артык бозау  алынды. Декабрь аенда район буенча планлаштырылганга карата 4 баш бозау  кимрәк  туды.   Аерым  хуҗалыклар буенча алганда саннар тагын да зуррак. Мисалга, “Юлбат” предприятиесендә декабрьдә 53 бозау алу көтелсә дә, 13кә  кимрәк туган.

 2025 елда терлекчелек тармагына сөт  сатып  алу бәяләре кими баруы тискәре  йогынты  ясады.    Гыйнвар аенда хуҗалыклар продукцияне комбинатларның уртача бәяләреннән 48,45 сумга (НДС кермичә) тапшырса, декабрь аенда 36,78  сумга  калды. Нәтиҗәдә көнгә 20 тоннадан  артык  сөт  сатучы хуҗалыклар аена 6 миллион  сумга  якын акча югалтты.Терлекчелек – зур чыгымнар таләп итүче авыр тармак. Мондый шартларда продукциянең  үзкыйммәтен киметү  чаралары  күрү, терлекләрне тоту  шартларын, азыкның сыйфатын тагын да  яхшырту көннән-көн зуррак әһәмияткә ия була бара. Шул  максаттан саву  заллары булмаган “Симет” җәмгыятендә, “Шытсу” предприятиесендә 2026-2028 елларда 600әр башка исәпләнгән сөт  комплексларын төзү, “Явлаштау”да  аның икенче  чиратын быел  ук  сафка бастыру  планлаштырыла. “Курсабаш”та,  “Мөхәммәтшин” хуҗалыгында  200 башка  исәпләнгән сыерлар тораклары  төзелешләре  дә  каралган.