Эльмира Касымова: “Волонтер – игелекле эшләрсез яши алмаган кеше»

  Сабадагы гуманитар ярдәм кабул итү, солдат ашлары әзерләү штабында кызу эш кайный. Биредән кеше өзелми. Авылларда олы җанлы апалар кич утырып теккән киемнәрен, окоп шартларында яшәү өчен кирәк-яракларны бирегә китерә. Без барында зур сумка күтәреп килеп кергән Резедә Җамалова да шуларның берсе. Иләбәрдә яши, 69 яшь үзенә. Бер елда 2 меңнән артык трусик, 700 рюкзак теккән. Ничек куллары талмыйдыр, кыскасы, күзләр генә тимәсен. Әзер товарны Эльмира Касыймовага тапшырды да, эшен дәвам итәргә тагын тукыма сорап алды. Бернинди чек-квитанция дигән нәрсә юк. Чөнки барысы да түләүсез. Ә дизайн остасы Эльмира ханым “Солдатка” проекты җитәкчесе, районның иң көчле волонтерларыннан берсе. Штабка китерелгән текстиль про­дукциясен, эчке киемнәрне кабул итеп ала, сортларга аерып, төргәклисен төргәкләп, адресларын билгеләп, киштәләргә урнаштыра. Алар тиздән СВО зонасына җибәреләчәк. Егетләр гуманитар ярдәмне бик көтеп ала. Текстиль әйберләре аларга гаилә учагы җылысын, әниләрнең йомшак күңеле назын алып килә. Кырыс окоп тормышында моннан да кадерлерәк нәрсә була аламы соң? Юктыр!

Эльмира ханым сөйли:

“Күрәсез, волонтерларның эчкерсезлегенә ты­ныч күңел белән карау мөмкин түгел. Штаб умарта оясыдай гөжли. Кием тегәргә бармаган киҗе-мамык тукымаларны да фронтка озатабыз. Алары да артмый, блиндажда аска җәяр өчен кирәк. Бервакыт штабка гуманитар йөк белән Донбасска йөрүче Җәмил Янгучин килеп керде. Киемнәрне юу турында сүз чыкты. Алгы сызыкта чакта мөмкин түгел хәл. Юмасыннар, ди Җәмил, алайса, тегүче апаларның күңел җылысы сеңгән урын-җир әйберләренең солдатларга бик тансык исе бетә. Күз яшьләрен китерде бу сүзләр”.

Аның туган ягыннан Сабага кайтып урнашканына 21 ел булган. Башта тормыш иптәше “разведка” ясый. Ярты ел эшләгәч, моннан да уңай җир тапмаячагын аңлап, гаиләсен дә алып килә. Эльмира Кеняш кызы Балалар иҗат үзәгенә өстәмә белем педагогы булып урнаша. Гимназиядә хор коллективы җыя, декоратив-гамәли, сынлы сәнгать шөгыльләре алып бара. Параллель рәвештә балаларны балчык пластикасы серләренә дә өйрәтә. Югары Утар социаль учреждениесендә тәрбияләнүчеләр белән дә эш­ли. Халык иҗатының “Без бер­гә” милли балалар фестивале “Остаз”номинациясе җиңүчесе, “Ел укытучысы” бәйгесе призеры була. Яшь буынны укыту һәм тәрбияләүгә керткән зур өлеше, күпьеллык намуслы хезмәте өчен Мәгариф һәм фән министрлыгының, Саба муниципаль районының Мактау грамоталары белән бүләкләнә. Эшеннән әнисенең авыруы сәбәпле китә һәм үзен волонтерлыкка багышлый.

“Мин характерым белән тик утыра торган кеше түгел, активлык, аралашырга яратам. “Хә­ят” клубы җитәкчесе Гөлнара Фәтхрахманованың солдат ашлары әзерләү тәкъдиме турында ишетеп, өйдә консервлар ясый, яшелчә, сохари киптерә башладым. Ирем дә булыша. Иңнәремдә канатлар тойдым. Әлбәттә, син бе­рүзең кырда сугышчы түгел. Ватсаптагы төркемебез зур. Бер-беребездән өйрәндек һәм баш­калардан калышмаска тырыштык. Солдатлардан рәхмәт сүзе язылган хәбәрләр килгәндә ике­ләтә тырышлык куя­сың. Аннары госпитальләргә матрасларга, урын-җир әйберләренә ихтыяҗ күпкә арткач, байтагыбыз тегү эшенә күчте. Сәрия, Резеда апалар, Шәмәрдәннән Алсу һәм башкалар”, – дип сөйли Эльмира Касыймова.

Ул штабта тукымаларны сортлауны үз өстенә алса, өендә тегү машинасы әйләндерә. Тәлгате аның детальләрен чак майлап өлгерә. Төн йокламыйча 362 мендәр, 1300гә якын мендәр эчлеге һәм тышы, 82 эчке кием, 600дән артык простыня, юрган сүрүе, капчык, 1000 салфетка теккәндә күпме тегү энәсе сындырганын инде үзе дә белми. “Волонтер – игелекле эшләрсез яши алмаган кеше. Ул башкаларга ярдәм итүдән тәм һәм тормышның мәгънәсен дә шуннан таба”, – ди фидакарьлеге өчен “Фронт перевозчиклары” фондының һәм ТР иреклелек мәгълүмати ресурслар үзәгенең Рәхмәт хатларына лаек булган ханым.

Гөлнара Фәтхрахманова, “Хәят” коммерцияле булмаган оешмасы җитәкчесе:

– Эльмира Кеняшевнада иҗади натура һәм талант бергә кушылып, рухландыргыч көчкә әверелгән. Командада лидерлык сәләте күрсәтә, яңа башлангычка инициативалы якын килә белә. Озак вакыт соралган вак эшне башкарырга кирәк булса, авырсынмыйча алына. Аның кебекләр күбрәк булсын иде”