Өйләрне генә түгел, күңелләрне дә җылытучылар

  Арча, Саба, Балык Бистәсе, Те­ләче районнарына хезмәт күр­сәтүче һәм 422 хезмәткәрне бер­ләштергән коллектив һөнәри бәй­рәмен быел да  лаеклы төс­тә,  матур  хезмәт  нәтиҗәләре бе­лән каршылый. Йортларыбызга берөзлексез  зәң­гәр ягулык килеп торып, хәвеф-хәтәрләрсез генә өйләребезне, күңелләребезне дә җылыта икән – болар газчыларның тырыш хез­мәте, үзләренә тапшырылган вазифаларын намус белән үтәү нәтиҗәсе.  Бүгенге көндә идарә 4060 километр газүткәргеч, 798 газ басымын көйләү пункты, 173 җир асты буйлап сузылган тимер газүткәргечләрнең электрохимик таралудан саклау станциясе, 2423 коммуналь-көнкүреш, 133 сәнәгать һәм авыл хуҗалыгы объектларына, 51073 фатир һәм шәхси хуҗалыкларга хезмәт күрсәтә.  Әле­ге тармак хез­мәткәрләрен җаваплылыгы чик­ләнгән  “Газпром Трансгаз Казань” җәмгыяте ге­нераль директоры  Рөстәм Усманов  данлыклы җәмгыятьнең 70 еллыгы һәм һөнәри  бәйрәмнәре  белән котлады.  “Сабагаз”  идарәсе һәрвакыттагыча үз йөзен, үз исемен аклап килә.  Данлы хезмәт юлы үткән коллектив Һәрдаим икътисадый һәм җитештерү күр­сәткечләрен үтәүгә ирешә. Әлбәттә, әлеге предприятиенең  бүгенге казанышларында, уңыш­ларында үзвакытында эшчәнлеккә ныклы нигез салып калдырган ве­те­раннарның өлеше зур. Аларның  тынгысыз, намуслы  хезмәтләрен инде  ныклы ышаныч белән  бү­генге коллектив дәвам итә. Мин һәрбер районда урнашкан газ хуҗалыгы хезмәткәрләренә көн­дәлек  җаваплы хезмәтләре өчен зур рәхмәтемне белдерәм. Югары профессиональлеккә ия кол­лективның  әле тагын да зур  нәтиҗәләргә ирешер мөмкинлеге бар”, – диде үз чыгышында Рөстәм Усманов һәм алдынгыларга РФ Энергетика министрлыгының, “Газ­пром Трансгаз Казань” җәм­­гыятенең Мактау грамота­ларын тапшырды. Идарәдә вете­ран­нар­ның урыны түрдән булуы яхшы  аңлашыла,  35 ел эретеп ябыштыручы булып эшләп, ике ел элек лаеклы ялга киткән Альберт Кашапов та  мөхтәрәм кунак буларак  чакырылган иде. Бәйрәм әләмен күтәрү хокукы да  Альберт Рафил улына һәм  идарәнең тырыш, намуслы хезмәткәре Альберт Маниховка бирелде. “Хезмәт кенәгәмдә  бары бер язу – 1989 елда “Сабагаз” идарәсенә эшкә алынуым турындагы мөһер генә бар.  Эретеп ябыштыручы булып эшкә кердем, газлаштыру башланган гына чор иде ул, Саба, Теләче районнарындагы  һәрбер йортка  газ керттек.  Эшебез җиңелләрдән булмаса да, тырышып,  күңел биреп башкардык. Бүгенге бәйрәмгә чакыруны да минем хезмәтемә олы бәя дип саныйм”, –ди  Альберт  Кашапов. "Сабагаз" идарәсен 35 ел җитәкләп, тынгысыз, фидакарь хезмәтләре өчен “Татарстан Республикасының атказанган торак-коммуналь хуҗалыгы хезмәткәре”, “Газ сәнәгатенең мактаулы хезмәткәре” һәм башка бик күп дәүләт бүләкләренә лаек булган Исмәгыйль Мөхетдинов үзе бәйрәмдә катнаша алмаса да,  хезмәттәшләре  җитәкченең сәламнәрен  озак алкышлады. 
  Район башлыгы Рәис Миң­неханов үз чыгышында газ сә­нәгате хезмәткәрләрен  хал­кы­бызның тормыш-көнкүрешендә  төп уңайлылык булдыручылар дип атады.

“Районыбызда 1978 елда иң беренчеләрдән булып Лесхозда зәңгәр ягулык кабынды. 1979 елны  Сабада беренче тапкыр  мәктәп котельныен тапшыралар. Газны җибәрер өчен “Газ буенча җаваплы” дигән документ сорала.  Ә ул беркемдә дә булмый. Рөстәм Нургалиевич ул вакытта  махсус укып, Лесхозда “Газ буенча җаваплы” дигән белешмәгә ия була.  Аның документы белән Саба районында беренче котельный җибәрелде”, – дип  районыбыздагы   газ белән бәйле истәлекләргә тукталды.  

Шулай ук бәйрәм чарасында Теләче, Балык Бистәсе районнары башлыклары Айрат Фәтхуллин, Радик Исламов, Арча районы баш­карма комитеты җитәкчесе урын­басары Илшат Галимуллин катнашып, әлеге өлкәдә озак еллар нәтиҗәле хезмәт куючыларга Мактау Грамоталары, Рәхмәт хатлары тапшырдылар. Идарәнең  газ җиһазларын эксплуатацияләү һәм ремонтлау  буенча 5 разрядлы слесаре Илнар Сәфәров РФ Энергетика министрлыгының Мактау грамотасына лаек булды.

“Идарәдә эшли башлаганыма 29 ел тулды. 1996 елда әлеге коллективта эшчәнлегемне башлаган идем, бүгенге вазифада 18 ел хезмәт куям. Без турыдан-туры халык  белән, өйләргә килеп эшлибез,  ягъни техник караулар  үткәрәбез.  Үземнең абонентларымны бик хөрмәт итәм, алар да миңа карата шундый ук мөгамәләдә дип уйлыйм. Хезмәтем өчен зур бүләккә лаек булуыма бик шатмын, җитәкчеләребезгә зур рәхмәтлемен. Киләчәктә дә шулай аңлашып, уртак тел табып эшләргә язсын, безнең хезмәттә башкача була да алмый”, – ди Илнар. 

Ирек Мөхетдинов үзе җитәкләгән коллективка намуслы хезмәтләре өчен  тирән рәхмәтен белдереп, моннан соң да кулны-кулга  тотынышып хезмәт итәргә чакырды.  
Үз эшчәнлекләрен  нәтиҗәле  итеп алып барган коллектив  матур итеп ял итәргә  дә сәләтле.  “Сабагаз”  идарәсе хезмәткәрләре дә үзләренең һөнәри бәйрәмнәрен лаеклы төстә, матур тантана  белән билгеләп үтте.  Күңелле уеннар­ны район мәдәният бүлеге хезмәткәрләренең матур чыгышлары алыштырып торды.

 “Мондый бәйрәмнәр коллективны тагын да берләштерә, якынайта.    Башка районнардагы хезмәттәшләр бе­лән бергәлектә үтүе  аеруча күңелле,  аралашабыз, һәркем  уеннарда үз көчен сынап карый. Мондый күңелле чаралар оештырырга мөмкинлек булдырган җитәкчеләребезгә бик зур рәхмәт”, – ди 26 ел  “Сабагаз”  идарәсендә эшләүче авария-диспетчерлык хе­змәте слесаре Илшат Шәкүров.