Гриппка каршы прививка коткара

  Көз – депрессия  генә түгел, сал­кын тиеп авырулар чоры да. Чыныкмаган, йомшак им­му­нитетлы  кешеләр аеруча мышык-мышык борын тарта, йөткерә башлый. Моны ста­тистика да  раслый. “Саба райо­нында һәм республика­да кискен  йогышлы  авыру­лар, грипп һәм  яңа  короно­вирус инфекциясе белән авы­ру­чы­ларның күбәюе кү­зәтелә. Бер атна эчендә генә дә ОРВИ диагнозы  куелганнар 29 про­центка  артты. Чирне  ките­реп чыгаручы вируслар кешедән кешегә йөткергәндә, төчкергәндә күчә. Юылмаган куллар да йогышлануга сәбәпче булырга мөмкин. Бу  сезонда гриппның А (H3N2) һәм В  штаммнары белән бер­гә A (H1N1) яки тиз таралу­чы дуңгыз гриппының да  ак­тивлашуы  көтелә. Аның бил­геләре: югары температура, йөткерү, баш, тамак  авыр­ту, хәлсезлек,  калтырау. Кай­бе­рәүләр эч  китүдән,  косасы  килүдән зарлана. Югары патогенлы  вирус үпкә  ял­кынсынуга,  сулыш  алу  җи­тешсезлегенә, хәтта  үлемгә  ки­терергә  мөмкин. Грипп бе­лән бер үк  вакытта ковид ви­русы эләктерү  ихтималы  да бар.  Шуңа да  вакытында  саклану чарасы күрергә ки­рәк”, – ди район үзәк хаста­ха­нәсенең эпидемиология мәсьәләләре буенча урынбасары Резеда Фәттахова.

Чара дигәнең гриппка кар­­­­шы вакытында, ягъни се­­­зоны башланганчы привив­ка ясату. Хәзерге  район дә­­валау-профилактика уч­реж­­­дениеләрендә “Ультрикс Квад­­ри” (гриппның 4 төренә  каршы) “Совигрипп” вакцина­лары кайткан. Соңгысының сос­­тавында токсиннары за­рар­сызландыручы, кү­зә­нәк­ләр­не кислородның актив формасыннан саклаучы совидон матдәсе бар. Прививка  ясатканнан  соң кешенең иммунитеты 10-12 көндә ныгый һәм  ел буена саклана. Ул авырып китсә дә, инфекцияне җиңел  формада үткәрә, пневмония, бронхит, менингит, миокардит кебек өзлегүләр булмый.

“Әлеге профилактика чарасы бигрәк тә еш  салкын тиеп авыручылар, диабет, хроник  чирләрдән интегүчеләр, кан басымы югары, йөрәгендә ишемия булган кешеләр өчен аеруча  әһәмиятле.  Прививканы шулай ук өлкәннәргә,  мәгариф хезмәткәрләренә, транс­порт, мәдәният, сәүдә, хез­мәт   күрсәтү өлкәсендә эш­­­­ләүчеләргә кадатырга ки­­ңәш ителә. Моның өчен Са­­ба үзәк, Шәмәрдән учас­­ток хастаханәләре, Иске Ик­шер­мә, Лесхоз табиблык ам­бу­ла­торияләре табибларына (те­рапевтларына), ФАПларга  мө­­рәҗәгать итәргә  кирәк”,– дип аңлата баш эпидемиолог.

Районда 1 ноябрьгә 14450 ке­ше вакцина алган инде. “Мин прививкага бик  уңай  ка­­рыйм. Кызларым да шул фикердә. Ел  саен ясатам. Пнев­мококка каршы да вакцина  алдым. Короновируска  каршы Турциядә  акча түләп  кадаттым. Файдасын күрәм. Авырсаң да, чир җиңелчә үтә. Исән-сау булыйк”, –диде Сабадан  Сәлимә Латыйпова.

Халык  медицинасы  чаралары

Салкын тиюләр һәм грипп эпидемиясе чорында профилак­тика максатыннан көн саен 2-3 тырнак сарымсак, суган ашарга киңәш ителә. Вак угычта кишер кырыгыз. Сыгып алынган кишер суына 1:1 исә­беннән зәйтүн мае һәм 2-3 тамчы сарымсак согы кушыгыз. Барлыкка килгән катнаш­маны борынга көненә өч тап­­кыр икешәр тамчы тамы­зы­­гыз.

Авыруны кисәтүнең өстәмә чаралары: борынны сабын, мар­­ганцовка, фурациллин, со­да эретмәсе һәм ромашка тө­нәт­­мәсе белән юдырырга.

Дарулар, витаминнар кулла­ныр алдыннан табиб белән ки­ңәшергә онытмагыз.