Якты эзе, күркәм эше калды….

Тәбрис Галиев райондаш­ла­рыбыз  күңелендә  энергияле, максатчан,  булдыклы  җитәкче,  шул ук вакытта  ачык  күңелле, ихлас, мәр­хәмәтле шәхес булып үзен­нән якты эз калдырып кит­те. Аның рухы һаман без­нең арада, без һаман да  эш процессында аның төп­ле киңәшләренә, акыллы фи­керләренә таянабыз.

Тәбрис Вәли улы Галиев 1953 елда Балтач районы Смәел авылында туган. 1973 елда Казан элемтә  электр техникумын тәмамлый. Ар­­мия сафларыннан соң,  хез­мәт эшчәнлеген Питрәч райо­нында электромеханик буларак  башлый. Соң­рак чит­­тән торып  Куйбышев элем­тә электр-техника инсти­тутында белем ала. 1980 елдан аның тормышы районыбыз белән бәйле: яшь, энергияле белгеч  Арча ЭТУСының Саба элемтә цехы начальнигы урынбасары итеп билгеләнә. Тырыш, инициа­тивалы ир-егетне  озакламый  җитәкче вазифасына тәкъ­дим итәләр. 1983-1993 елларда почта һәм телефон элемтәсе бер  оешма  булып, ул  РУС ( район элемтә узелы) дип йөртелә. Оешма белән  Тәбрис Вәли улы  җитәкчелек итә. Үзенә тапшырылган ыша­нычны һәрвакыт югары йөртеп,  вафатына кадәр  үзе­нең бөтен гомерен районыбызда элемтәнең югары сыйфаты өчен ныклы инфраструктура булдыруга багышлады. Аның булдыклылыгы, алдан күрүчәнлеге нигезендә  районыбызда элемтә тармагы заманча технологияләр белән баетыла барылды.

2002 елда  Татарстанда бе­ренчеләрдән булып райо­ны­бызның  авыл араларына оптик җепселле линия салына башлады. Бу цифрлы АТСлар куярга мөмкинлек бирде. Соңрак интернет, IP-TV тоташтыру мөмкинлекләре ту­дырылды. Аның тырышлыгы белән тоташтырылган интернет, телевидение бүгенге көндә дә районыбыз халкына игелекле   хезмәт итә.  

Мин 1996 елда Тәбрис Вә­ли улы чакыруы белән электромонтер булып эшкә ки­леп,  озак еллар аның җи­тәкчелегендә  хезмәт куй­дым. Ул соңгы көнгә кадәр үзен аямыйча, җиң сызганып халыкка хезмәт итте. Кешенең хәлен аңлый торган, ярдәмчел, кешелек­ле, йомшак күнелле кеше иде. Һәркем белән килешеп эшли торган җитәкче буларак  коллективның  ихти­рамын яулады. Ярдәм сорап кергән кешене беркайчан кире какмады, үтенечен аяк астына салмады. Тәб­рис Вәли улының алдан күрүчәнлек сәләте бик көчле иде: «Гөлшат, берничә елдан кешеләр телефон өчен түләргә дә чыгып йөрмиячәк, бөтенесен өйләреннән генә башкарачак­лар» дигән сүз­ләре бүгенге көнне күзаллап әйтелгәндер. Киләчәкне ал­дан күреп, алдына куйган максатына ирешүгә нык ихтыяр белән омтылып, ашкынып яшәде ул. Җи­тәкчебезнең тырыш хезмәте югары бәяләнә: 2003  елда ТР Элемтә министрлыгының Мактау Грамотасына,  2005 елда  «Татарстанның атказанган элемтә хезмәткәре» дигән мактаулы исемгә лаек була.

Тәбрис Вәлиевич үзенең тирән белемен,  бөтен  осталыгын, тәҗрибәсен   улы  Ал­маз  Галиевка  тапшырып китте,  аның эшен улы дәвам итә.   Бүгенге көндә районара электр элемтәсе челтәрендә   Алмаз Тәбрис улы җитәк­челегендә Саба, Балтач, Кукмара, Теләче районнарында 100 кеше халыкка хезмәт күрсәтә.  Замананың тагын бер үзгәреш чоры аның улы җитәкчелегендә бара. Хә­зер  без Татарстанда иң беренчеләрдән булып  зур тизлектә эшли торган  GPON технологиясенә күчү чорын кичерәбез. Бүгенге яуланылган заманча  технологияләргә һәм  телекоммуникация ча­ра­ларының  югары күрсәт­кечләренә ирешүендә Тәбрис Вәли улының өлеше зур.  Остазыбыз салган юлдан тайпылмыйча, хезмәтебезне   аның  рухы шат булырлык итеп  дәвам итәргә тырыша­быз. Тәбрис Вәли улы Галиев якты йөзе, күркәм эше белән райондашларыбыз кү­­ңе­лен­дә мәңге  сакланып, эш­ләгән изге гамәлләре аның рухына дога булып барып ирешсә иде.

Гөлшат Хәлилова,

«Таттелеком» акционерлык җәмгыятенең Саба районара электр элемтәсе челтәре баш инженеры.