Яшәвем белән мин гемодиализга бурычлы

Моннан  ярты гасыр элек Шәмәрдән участок хастаханәсе тимер юлга терәлеп диярлек торган ике катлы  агач бинада  урнашкан иде. Ул  вакытта  поездлар туктаусыз  үтеп  тора, төне буе шуларның тавышын тыңлап  ятасың.

     Хәзер хастаханә бинасы үзенә терапия гемодиализ бүлекләре һәм районара күз хирургиясе, «Өмет» тернәкләндерү үзәк­лә­рен сыйдырган корпус­тан  гый­барәт. Бирегә күрше тө­бәк­ләрдән дә киләләр.

     2005  елда  ачылган гемодиализ бүлегенә, мәсәлән, Арча, Балтач, Теләче, Кукмара районнарыннан бөерләренең хроник рәвештә җитәрлек дәрәҗәдә эшләмәвеннән интегүчеләр  йө­ри. Ягъни 40  километр ради­ус­­лы территориягә бер үзәк ту­ры  килә. Аңарчы әлеге диаг­ноз куелганнар көн аралаш Казанга чыгып  китәргә мәҗбүр иде. Бүлектә “ясалма  бөер” про­цедуралары үтү өчен барлык шартлар тудырылган. Ике диализ залы  идарә итү пульты булган кәнәфиләре, индивидуаль өстәлләр белән тәэмин ителгән.

“Хәзерге вакытта бездә 60 пациент дәвалана, алар тө­гәл билгеләнгән көннәрдә ге­нә йөри. Әйтик, 30 авыру дү­шәмбе, чәршәмбе һәм җомга килсә, икенче төркем сишәмбе, пәнҗешәмбе һәм шимбәдә кабул ителә. Аларга  махсус укулар һәм стажировка үтеп,  Фрезениус аппараты белән эшләргә өйрәнгән шәфкать туташлары  хезмәт  күрсәтә. “Ясалма бөер”гә бер үк  вакытта 23 авыру тоташтырыла, диализ технологиясенең  яхшы  сыйфатлы материаллары  кулланыла”,– ди өлкән шәфкать туташы  Фирдания Шакирова. 

       Канны тулысынча чистарту өчен аппаратта 4 сәгать утырырга  кирәк. Бөерләр бөтенләй эшләми башлаган очракта яшәү­не дәвам итүнең альтернатив  чарасы шушы. Кинәт кенә  үз­гәреп  киткән тормышка әкренләп  көйләнәсең. Диализлы гомер  озынлыгы   күп факторларга бәйле. Без танышкан пациентларның  берсе  – Равия апа инде 27 ел нефрологлар клиенты икән.

“Шәмәрдәндә бүлек  ачылганчы Казанга бара  идем. Хәзер юлда йөрисе түгел, җайлы”,– ди  ул. Ә Фәнил Гаязов процедура  урыны  якын булсын  өчен  Кукмарадан  Шәмәрдәнгә күченгән. “Бөерләр белән проб­лема  килеп  чыккач, шундый  ка­рарга килдем. Хөкүмәт без­нең турыда кайгырта, бүлек  персоналы безнең белән  бик  ях­шы  мөгамәләдә. Түләүсез дә­ва­ланабыз. Бер сеанс  алу  10  мең  сум тора.  Атнага 30 мең дигән   сүз. Дәүләт чыгымнарны үз  өстенә  алмаса,  ул  кадәр сум­маны  каян табасың!  Яшәвем белән мин гемодиализга бурычлы”,– ди ул.

     Табиб-нефролог Эльмира  Нуруллина әйтүенчә,  бөерләрнең эшләми башлавына диабет,  гипертония, кан әйләнеше бозылуы, аутоиммун, кискен инфекция авырулары сәбәпче була  ала.   Чир яшьләрне дә аямый. Гемодиализның иң  яшь пациенты, мәсәлән, 1997 елгы. Аппаратка бәйлелектән  котылу өчен донор бөер  күчереп  утырту практикасы  да  кулланыла.

“Аңа кичектергесез мохтаҗ  кешене теләсә  кайсы  вакытта  Казанга чакыртып  алырга  мөмкиннәр. Тикшерүләр үтәсең. Әмма донор органы  туры  килмәсә, кире борып  кайтаралар. Шуңа  күрә яңа  бөер  куйдыру өчен озак көтәргә туры  килә”,– ди табиб.

      Бүлектә кеше гомере  өчен алсыз-ялсыз, тәнәфесләрсез  көрәш бара.

      Гомумән, кешеләр бөерем эшләми дип, төшенкелеккә би­релмиләр, тормышка оптимистларча карыйлар.