Яшьләрне дәүләт кайгырта

 27 февральдә “Татарстан Республикасында яшь гаиләләрне торак белән тәэмин итү программасы” кысаларында тантаналы шартларда алты гаиләгә торак сертификатлары тапшырылды. Быел йорт (фатир) сатып алу яисә төзүгә социаль субсидиягә барлыгы тугыз гаилә ия булачак. ТР Яшьләр эшләре министрлыгы аша гамәлгә ашырылган әлеге программаның төп асылы 35 яшьтән узмаган, торакка мохтаҗ, һәр икесенең дә эш урыннары булган гаиләләргә 35 процент күләмендә кире кайтарылмый торган дәүләт субсидиясе бирелүдән гыйбарәт. Узган атнада муниципаль район башлыгы урынбасары Расих Закирҗанов Сабадан Каюмовлар, Фәлаховлар, Вәлиевлар, Шәмәрдәннән Закировлар, Кече Шыңардан Әхмәтовлар, Зиннәтовлар гаиләләрен тәбрикләп, торак шартларын яхшыртуга юнәлтелгән сертификатларны тапшырды. Әлеге тантаналы чарага яшь гаиләләр балалары белән бергә килеп, сабыйлар да әлеге күңелле вакыйганың шаһите булдылар. Расих Рәхимҗан улы яшьләргә сертификаттан файдалану тәртипләрен аңлатты, 1 ай эчендә банкта счетлар ачарга чакырды.

“Сезнең бүген бик тантаналы көн. Дәүләт тарафыннан торак шартларын яхшыртуга акча бүленеп биреләчәк. Соңгы өч елда шактый гына гаиләләргә әлеге программа нигезендә торак шартларын яхшыртуга мөмкинлек тудырылды. Берничә ел элек берәр-икешәр генә булса, өченче ел сигез, узган ел ун гаилә сертификатка ия булды. Бүген алты гаилә әлеге шатлыклы хисләрне кичерә, министрлык тарафыннан билгеләнгән тагын өч гаилә документ эшләре тәмамлануга торак сертификатына ия булачак”, – диде Расих Закирҗанов.

Аңлашылганча, әлеге программа йорт (фатир) сатып алырга яисә салуга каралган. Йорт сатып алганда, җир кишәрлеге яшь гаиләнең үз хисабына рәсмиләштерелә. Акча фәкать йорт өчен генә бирелә. Әлеге программага исәп тотканда балалар саны да зур роль уйный. Әлбәттә, өстенлек өч һәм аннан күбрәк бала тәрбияләүче гаиләләргә бирелә. Ягъни гаилә ишлерәк булган саен чират та тизрәк бара. Гаиләләр җиде ай эчендә субсидияне тиешле максатка тотып бетерергә тиешләр. Быел министрлык белән килешүләрдә әлеге программага барлыгы 23,352 миллион сум акча каралган.

“Инде гаризалар 2026 елга әзерләнеп, торак сертификаты биреләчәк гаиләләр белән эш алып барабыз. Беренче чиратта махсус хәрби операциядә катнашучы ирегетләрнең гаиләләренең торак шартларын яхшырту булса, шулай ук вакытта башка гаиләләрне дә барлау бара. Торак сертификаты суммалары министрлык тарафыннан раслана. Ул мәйдан нормативына карап бер кешегә 18 квадрат метр исәбеннән билгеләнә, әгәр гаилә составында 3 кеше икән – 54, бишәү булса 90 квадрат метрдан ким булырга тиеш түгел”, –диде Расих Закирҗанов.

Кече Шыңар авылыннан Әхмәтовлар тантанага кызлары Алсу һәм уллары Айзат белән килгәннәр иде.

“Әлеге программага 2023 елда документлар җыеп тапшырдык. Бу көнне бик көтеп алдык. Бик шатлыклы, дулкынландыргыч хисләр кичерәбез. Икебез дә мәктәптә балаларга белем бирәбез. Әлеге сертификатта каралган суммага яңа йорт салып чыгарга җыенабыз. Әлегә бала акчалары да алынмаган, аларны да яңа төзелеш эшләренә файдаланачакбыз. Хәзер төп йортта яшибез. Яшьләрне кайгыртып, шундый мөмкинлекләр тудырган җитәкчеләргә зур рәхмәтлебез”, – диләр Алисә, Айдар Әхмәтовлар.