Курсабаш мәктәбе-интернатында мөмкинлекләр фестивале булды

   Татарстан Республикасында беренче тапкыр инвалидлар һәм сәламәтлек мөмкинлекләре чикләнгән затлар арасында «Абилимпикс» һөнәри осталык буенча милли чемпионатның төбәк этабы кысаларында авыр һәм күп төрле үсеш, шул исәптән интеллектуаль тайпылышлары булган затлар өчен “Мөмкинлекләр фестивале” бара.

Бүген әлеге чара Курсабаш сәламәтлек мөмкинлекләре чикләнгән балалар  мәктәбе-интернатында узды. Катнашучылар алдында сәламләү сүзе белән район башлыгы Рәис Миңнеханов чыгыш ясады.

“Икенче  ел  инде менталь кимчелекләре булган балалар өчен шундый  фестиваль үткәрәбез. Алар, әлбәттә,  зур  конкурсларда  катнаша  алмыйлар. Әмма  һөнәри эшчәнлекнең аерым төрләрен үзләштерә алырлык  балалар да  шактый. Башта хобби, ниндидер  мавыктыргыч  шөгыль рәвешендә  булса, күнекмәләр ныклап үсеш алганда һөнәргә дә әверелергә мөмкин. Шул  максаттан районнарда 10 мәйданчыкта  үткәреләчәк  фестивальдә балалар 23 компетенция буенча үз мөмкинлекләрен күрсәтәчәкләр. Алга таба алар шул юнәлештә камилләшерләр дигән  ышаныч бар. Иң  мөһиме, мондый  фестивальләрдә әти-әниләр дә күбрәк катнашуларын телибез. Алар  балаларының ни белән  кызыксынуларын, нәрсә эшли һәм ни дәрәҗәдә  моны  булдыра  алуларын чаралар  барышында  күрергә тиешләр”, – дип   сөйләде Татарстан Республикасы хезмәт, халыкны эш белән тәэмин итү һәм социаль яклау министры урынбасары Юлия Абдреева.

   Мөмкинлекләр фестивалендә Югары  Утар психик тайпылышлары булган гражданнар  өчен балалар интернат-йорты,  Кызыл Мишә сәламәтлек мөмкинлекләре чикләнгән балалар мәктәбе-интернатында тәрбияләнүчеләр катнашты. Чара программасында “Сабын кайнату”, “Пластилин белән картина ясау”, “Төймәләр белән картина ясау”, “Нәфис сүз”, “Җыр сәнгате”, “Бисердан эшләнмәләр ясау”, “Пирография”  компетенцияләре буенча биремнәр бар иде. Һәр катнашучы үзләренең мөмкинлеген сынап карады һәм сынатмыйча, уңышлы гына башкарып та чыкты. Аларга волонтерлар  булышты, экспертлар  эшләренә бәя бирде. Балалар  үзләренә ышанып,  кыенлыкларны җиңүгә иреште. Олыяздан Алинә Хөснетдинова төймәләрдән чәчәк картинасы ясаган  иде. Бик  матур  килеп  чыккан,  күргәзмәгә  куярлык булган. “Без  фестивальдә икенче  елыбызны катнашабыз. Беренчесендә кызым Кызыл Мишә мәктәбендә  укый   иде. Быел да  чакыру  алгач, бик теләп риза булып  килдек, бик  ошады”,– диде Алинәнең әнисе Алсу ханым.

Гомумән, һәр катнашучы, аларның сәләте, тырышлыгы игътибарга, ихтирамга лаек. Әлбәттә, компенцияләр буенча  урыннар  билгеләнмәде. Кем  катнашкан – барысы да җиңүче.

 Катнашучыларга  бүләкләрне Рәис Миңнеханов, Юлия Абдреева, шулай ук “Һөнәри компетенцияләрне  үстерү үзәге программа директоры, психолог Адилә Исхакова,  Мәгариф һәм  фән министрлыгының гомуми белем бирү һәм укучыларны йомгаклау аттестацияләү бүлеге әйдәп баручы консультанты Илнур Газимҗанов тапшырды.

Тулырак «Саба таннары» газетасында  укыгыз.