“Мичән” – “Икенче икмәк”ле хуҗалык

  Безнең районда хәзер бәрәңге үстерү белән “Саба” җәмгыятенең Мичән бүлекчәсендә генә шө­гыль­ләнәләр. Аларда да  зур булмаган  мәйданнарда. Шулай да аз­мы-күпме – бу эшне башкаруга зур хезмәт  таләп ителә. “Мичән” бүлекчәсендә бәрәңге соңгы елларда 20 гектарда игелә. Быел “Икенче икмәк”нең “Ред леди”,  “Королева Анна” сортларыннан баш тартып,  фәкать “Гала”ны  гы­на­  утырталар. Ул бездәге табигать­ шартларына яраклашкан. Уңы­­­шын­ өлгертү өчен 70-80 көн дә­ җи­тә. Базарга  куйсаң, тышкы кыя­фәте белән кулланучыларның  игъ­тибарын тиз җәлеп итә. Әм­ма туфракның дымлылыгына та­ләп­чән. Шуңа күрә бүлекчәдә 12 гек­тарлы кырдагысын сугарып үс­те­рә­чәкләр.

Быел симәнәне туфракка күм­дерүче “Гримме” агрегатын 20­ елдан артык механизатор стажлы  Раушан Халиковка  ышанып тапшырганнар. Техниканың  көен,  җаен, тәртибен белеп эш­лә­тә.

 “Технологиясендә әллә ни аер­ма юк  инде. Агрегат гектарына   36  центнер  бәрәңге  орлы­гы  кертүгә  көйләнгән. Шушы  нор­ма  саклана. Көнгә  уртача 8-9 гектарда эшләп була”, – ди  ул.

“Гримме”га Тәлгать  Байназаров белән  Айдар Нургалиев хезмәт  күрсәтә.

“Татарчасы ничектер,  бу  басуны пойма дип әйтергә була. Мәйдан көздән тирәнәйтелде һәм гектарына  5 центнердан  аммиак  суы­  кертеп  калдырылды. Туфрак пешкәч тракторчы   Фаяз  Заһидуллин тырмалады.  Айдар Галимуллин КПС-3,8, аннары “Саба” җәмгыятеннән Илназ  Са­биров “Смарагд” агрегаты бе­лән­ культивацияләде. Утырту ал­дыннан Фаяз Заһидуллин фр­е­­за белән яңадан эшкәртте. Го­мумән, туфрак иләнеп бетте, бер кәсәнкәсе калмады. Хәзер Раушан Халиков “Гримме”да берьюлы өч агротехник чараны башкара: гектарына  2 центнер исә­беннән  катлаулы  ашлама (азофоска) һәм чирләргә,  корткычларга каршы препаратлар кертә, әлбәттә, инде бәрәңге утырта. Симәнәне подвалдан механизатор Альберт  Хәйруллин төяп тора, Айнур  Фазылов, Ранур  Мөбарәков,  Радил  Зарипов кырга  алып  чыга.  Әнәс  Бәйрәмовка агрегатны  ашлама белән  тәэмин итү  йөкләнгән”, – дип  аңлатты  хуҗалык  җитәкчесе  Рамил Шәй­­мәрданов.

 Ә “пойма”ның ни икә­нен Алисадан сорадык. Язгы та­шулар  вакытында су  җәелә тор­ган болын икән. Димәк, бә­рәңге өчен  уңайлы плантация.  Шуның  өстенә үсентеләр  кү­ренүгә, Нариман Корбанов,  Ай­зат Гыйльметдинов “Фрегат”  аг­­ре­гатында  сугаруны да башлаячаклар.

Күренгәнчә, гектары зур булмаса да, “икенче икмәк”  фронтына дистәгә  якын техника һәм механизаторлар  җәлеп ителгән. Тырышлыклары  бушка  китмәс.

“Һәр  гектардан 300 центнердан артык уңыш  алырга ният итеп торабыз. Шуннан да төгәлрәк итеп әйтеп булмый. Һава шартлары ничек  килә бит”, – диде җитәкче.