Музыка һәм матурлык гармониясе

Сәнгать мәктәбенә – 60 ел 

 1965 елда Сабада районның   киләчәге  өчен  әһәмиятле вакыйга була: мәчет  янәшәсендәге  иске  агач бинада ТАССР Мәдәният министрлыгы тарафыннан балалар музыка мәктәбе ачыла. Биредән  урамга гармун моңы, пианино (фортепиано) музыкасы  ишетелә башлый. Балаларның шат авазлары гел яңгырап тора. Мәктәпнең беренче укытучылары һәм нигез салучылары Марс Кәшипов (тумышы белән Кукмарадан) белән якташыбыз Венера Гәрәева була.

  Шушы  вакыйгадан  соң 60  ел  вакыт   узган һәм кемнәр генә  музыка мәктәбендә төрле музыка  коралларында  уйнарга  өйрәнмәгән! Шушы  чорда  биредә 1261 кыз һәм  егет музыкаль белем  алган. Аларның кайберләре узган шимбәдә билгеләп  үтелгән  юбилей  кичәсенә дә  килгән  иде.

  “Сәнгать  мәктәбе  укучыларны  онытылмаслык еллар,  кызыклы  ачышлар,  җиңүләр бүләк итә.  Кыю булырга үз-үзеңә ышанырга  өйрәтә. Мәктәпне  тәмамлаучылар  барысы да профессиональ  музыкантлар булып  китмәсә дә, алган белемнәре  аларга киләчәктә  зур  уңышларга   китерә. Мәктәбебездә  сәнгатькә  гашыйк,  күп  талантларны  ачуда  ярдәм итүче  һөнәр ияләре эшли. Яшь  буынны  хыялланырга, иҗат итәргә өйрәтә. Сезгә тынгысыз   хезмәтегез,  яңа идеяләр  белән алга таба да  янып эшләргә,  матур  чаралар белән  халыкны сөендерергә  язсын. Сәнгатькә  мәхәббәтегез, эшегезгә  тугры  булуыгыз,  бу дөньяның  гүзәллеген  балалар   күңеленә  сала  алуыгыз   өчен зур рәхмәт. Безгә  барлык  уңайлы шартлар тудырып,  матди-техник базасын яхшыртып, заманча уен кораллары, җиһазлар,  сәхнә костюмнары белән баетып торучы  җитәкчеләргә зур уңышлар телим”,– диде сәнгать мәктәбе директоры  Алмаз Газизов тантаналы  ачылышта  ясаган чыгышында.

    Кичә бай программалы  иде. Концертта кыллы, тынлы уен  коралларында яңгыраган виртуоз чыгышлар, классик, халык музыкасы, Чайковский һәм башка  күренекле  композиторлар әсәрләре мәктәпнең барлык юнәлешләре спектрын ачык күрсәтте. Әйтик,  Наилә Гайнанова җитәкчелек иткән елларда (1978-1981) ачылган скрипка сыйныфы, Атказанган  мәдәният хезмәткәре  Ильяс Сафиуллин директорлык иткән чорда (1981-2009 еллар) хореография бүлеге, тальянчылар ансамбле барлыкка килү, Шәмәрдәндә  филиал  ачылу да  күпләрне  серле  музыка  сәнгатенә гашыйк итә.  “Үзем  1969  елдан  эшли башладым. Венера  Гәрәева  район  хоры белән  җитәкчелек итә  иде.  Балалар җыю  авыр,  укытучылар  кайтмый.  Иң беренче чиратта  мин  Казан музыка училищесы  директоры  Резеда  Газизовнага  бик рәхмәтле. Ул Сабага берничә  буын  укытучылар  җибәрде. Районда  калучылар  да булды.  1993 елда элеккеге хакимият бинасына күченгәч, учреждение балалар сәнгать мәктәбе итеп үзгәртелде һәм композиторлар Аллаһияр һәм Хөснулла Вәлиуллиннар исемен йөртә башлады. Район һәм республика күләмендәге күп чараларда   катнаштык,  конкурсларда призлы  урыннар   алдык”,– дип   сөйләде Ильяс Сафиуллин һәм  коллективка  уңышлар теләде. Сәнгать мәктәбендә өстәмә белем  алучылар тормышта  югалмый.  Ильяс  абыйсы мәктәптә музыкаль  сәләте  ачылып  бетмәгәч, аяк  астында буталып  йөрмә,  дип  өенә  кайтарып  җибәргән Рөстәм  Заһидуллин да барыбер мәдәният әһеле булды. Ул  җитәкләгән  бүлек районда  сәнгатьне үстерү проектларын  актив  җәелдерә. Бинага капремонт турында  да  сүз  булды. Шуннан  соң сәнгать  мәктәбенең  мөмкинлекләре тагын  киңәйтеләчәк.

   Юбилей   уңаеннан Грамоталар да  күп   язылган. Аларны тапшыруда   Бөтенроссия мәдәният хезмәткәрләре һөнәри берлегенең Татарстан Республика оешмасы рәисе Альбина Сабитова катнашты. “Сабалылардан  ак   көңләшү белән   көнләшәм. Башка  районннарга еш бармасам да,  Рөстәм  Фидаилович  чакыргач,  Сабага бәйрәм  саен  киләм. Сәнгать мәктәбе юбилее  республика  өчен дә зур бәйрәм”,– диде  министрлык  вәкиле. 

Тулырак район газетасында  укыгыз