«Нәфис» хәйрия фонды кайгырта

Татарстанда «Нәфис» фондының махсус хәрби операциядә катнашучыларның гаиләләренә ярдәм итү хәйрия акциясе бара. Көнкүреш химиясе һәм  азык-төлек продуктлары җыелмаларын махсус хәрби операциядә һәлак булучыларның һәр гаилә әгъзасы, шулай ук сугыш хәрәкәтләре нәтиҗәсендә I һәм II төркем инвалид булган солдатларның гаиләләре ала. Исемлеккә консервланган ит, төрле ярмалар, макарон, шикәр, он, үсемлек мае, майонез, кетчуп һәм джем, шулай ук савыт-саба юу чаралары, кер юу-чистарту порошоклары, шампунь, сабын кергән.

    Саба районында гуманитар җыелмалар ирләре  яки  уллары  СВОда һәлак булган һәм инвалид булып кайтучыларның гаиләләреннән барысы 73 кешегә бирелде. Шәмәрдәндә җирлек башлыгы  Альберт Вәлиев исемлеккә  кертелгәннәрнең барысына да  «Нәфис» хәйрия фонды бүләкләрен  волонтерлар белән өенә  яки  фатирына илтеп тапшырды. “Безне шулай искә алып, зурлаучыларга Аллаһ хәерле озын гомерләр бирсен. Альберт та гел искә ала, хәлебезне белешеп,  кайгыртып тора. Улыбыз Данилне  2024 елның  6 июлендә  җирләдек.  Бик авыр булды, 32 яшьтә, өйләнергә җыена,  фатир да алган иде. Улымны берни дә  алыштыра  алмый. Инде шунысы өчен бераз тынычланам, барырга кабере бар. Ярабби, мондый хәсрәтне башкаларга   күрсәтмәсен”,– диде Данилнең әнисе Гөлсинә Гыйльметдинова күз яшьләре белән. Вакыт барысын  да дәвалый дисәләр дә, зиратларга сукмак, ай-џай, өзелерме икән? Юктыр. Шәмәрдәндә цинк табутларда  кайтканнарның каберләре  янында  сәгатьләр-көннәр буе басып торучыларны  күрүчеләр дә бар. 2023 елда тормыш иптәше  Сергей Никитинны югалткан  Елена Андреевна образлы әйткәнчә,  алар  инде йөрәк ярасы белән   яшәргә өйрәнә. Тормыш  дәвам итә, ләкин гомер төзәлмәс җәрәхәтле күңел белән...