Өлкәннәргә тагын бер мөмкинлек тудырылды

Бүген Россия социаль фондының   Саба районындагы клиентларга хезмәт күрсәтү бинасында  өлкән буын белән аралашу үзәге ачылды. Әлеге яңалыкка багышланган тантанада башкарма  комитет җитәкчесенең социаль мәсьәләләр буенча  урынбасары Марат Кәримов,  Россия пенсионерлар берлегенең район бүлекчәсе рәисе  Газинур Габделхаков, ветераннар һәм инвалидлар оешмалары җитәкчеләре катнашты. “Үзәкнең төп максаты – өлкән яшьтәге кешеләрнең ялын оештыру. Пенсионерлар биредә очрашып аралаша, чаралар үткәрә, төрле түгәрәкләр оештыра алачак. Сораулар туса, пенсия грамоталылыгы буенча лекцияләр дә үткәреләчәк”,– диде клиентларга хезмәт күрсәтү бүлеге җитәкчесе Марат Мөгътәсимов. Марат Кәримов та үзәкнең район  пенсионерлары  тормышындагы әһәмиятен билгеләп  үтте. Өлкәннәрне үзенә тарту көченә ия булып, аларның яраткан  урынына әверелер, дигән теләк белдерде.

“Без күбрәк ветераннар җәмгыяте белән  эшлибез. Шул  ук  вакытта социаль фондның да бу юнәлештә үз максатлары бар. Үзәк шуларны күздә тотып булдырылган бер урын. Районда өлкәннәр  өчен  мөмкинлекләр  күп, мәдәният,  спорт,  социаль учреждениеләр ишекләре һәрвакыт  ачык. Яңа  ачылган үзәк тә шундый  бер инструмент, үзенә  тартып тора торучы  нокта булсын. Биредә “Түгәрәк  өстәл”ләр үткәрергә дә, турыдан-туры  социаль  фондка карата сораулар туганда, русча әйткәндә,  из первых  уст, хәл итәргә була. Шуңа  күрә үзәккә  йөрегез, кулланыгыз, барысы да  сезнең  өчен”, – диде ул.

 Алга таба Газинур Габделхаков үзәктә чаралар үткәрү планнарына кагылышлы фикерләре белән  уртаклашты. Инде беренчесе үтте дияргә дә була. Клиентлар хезмәтенең  пенсия билгеләү бүлеге начальнигы Наилә Сабирова чыгышы  зур кызыксыну  уятты һәм сораулар да тудырды. Эш стажлары  бер булса да, ни өчен  аның пенсиясе минекеннән күбрәк дип аптырып   йөрүчеләр шактый. Еш  кына мәгълүмат  чараларында пенсияләр артуга,индексация  ясауга кагылышлы язмаларның өлкәннәр аңларлык телдә бирелмәве,  төгәл  мисалларда  күрсәтелмәве турында да әйтелде. Болар алга таба эш  оештырганда исәпкә  алынырга тиеш.