Олы Шыңар авылында яшәүче Хәбир ага Гайнановны 90 яшьлек юбилее белән котладылар

 Гайнанов Хәбир Гайнан улы  1935 елның 23 маенда Кече Шыңар авылында туа.

“Әти сугышка киткәндә  без 3 бала калдык. 1941 елда китте дә, исән-сау кайта алмады, 1944 елның 26 июнендә үлгән дигән хәбәре килде. Ул Белоруссиянең Шумилино поселогында  күмелгән” – дип искә ала ул.

Сугыш вакытындагы ачлык, ялангачлыклар аның исеннән бер дә чыкмый. “Ул вакытта ашарга юк, ачлык. Атлык, кычыткан ашап үстек. Бернәрсә дә юк иде.” Ачлыктан шешенә башлагач аларны сеңлесе белән икесен  әниләренең Керәнне авылында яшәүче апасы үзләренә тәрбиягә алып китә, анда 2 ел яшиләр. Мәктәптә дә 2 сыйныфны шунда укый. Эш яшенә кергәч колхозда эшли башлый. Аннан соң  Совет армиясе сафларына алына, Германиядә 3 ел хезмәт итә. Кайткач  хезмәт юлын колхозда дәвам итә, тракторчылар курсын тәмамлый, кичке мәктәптә дә укый. Лаеклы ялга чыкканчы  фермада слесарь булып эшли. Колхоз рәисе аны инженер Хәбир дип йөртә торган була. Хезмәтен хөрмәтләп бик күп Мактау кәгазьләре ала, рәсеме колхозның Мактау тактасында тора. Аңа “Ленинның тууына 100 ел”, “Хезмәт ветераны” дигән медальләр дә тапшырыла. Олы Шыңар мәктәбенә укытучы булып эшкә килгән Сатыш авылы кызы Факихә апа белән танышалар һәм 1961 елда өйләнешәләр. 6 бала тәрбияләп үстерәләр, 12 оныклары, 5 оныкчыклары бар. 60 ел бергә яшәгәннән соң тормыш иптәше 2021 елда вафат була. Хәбир абый бүгенге көндә Кече Шыңар авылында үз йортында кызы Миләүшә тәрбиясендә яши.