Пристав хезмәте: Иң яхшысы - әҗәтләрсез яшәү

Татарстанда суд приставлары хезмәте, дәүләт структурасы буларак,  1997 елда барлыкка  килә.

Саба районы бүлегендә  җи­тәк­­че итеп Фәйзерахман Зәй­нул­­лин билгеләнә.  Ул чакта штат берәмлеге 8 генә булса, хәзер 18гә җит­керелде. Суд приставлары  хезмәте  законлылыкны ныгытуда һәм җәмгыятьтә гаделлеккә уңай  караш  формалаштыруда  зур роль  уйный.  Эшләренең   төп максаты Россия ипмериясенең юстиция министры Гавриил Державин сүзләрендә чагылган: “Суд приставларының бурычы – закон сагында тору, көчлеләр ал­дын­да бирешмәскә!”

“Эшчәнлегебез күпкырлы.  Ад­­министратив  хокук бозулар ту­­рындагы яңа Россия  Федера­циясе  кодексы суд прис­тав­ла­ры­на  үз бурычларын  үтә­гәндә хо­­кук бозулар  фактла­ры  буен­ча  беркетмәләр төзү хокукы  да  бирде. Киң катлау җә­мә­гать­челек  каршында суд приставы   статусының  сизелер­лек   кү­тә­релүе  куандыра. Суд приставы беренче   чиратта намуслы, объектив  карашлы, тиз хәрәкәт итәргә  сәләтле  кеше  булырга  тиеш. Бүлектә һәр хезмәткәр вазифасына  намус белән карый. Әйтик, суд приставы башкаручысы Динә Хөсәенова   салым органнары карарларын үтәтү  буенча нәтиҗәле эшләп, төрле дәрәҗә бюджетларга 4 миллион сумнан артык  акча керүдә үз өлешен кертте.  Динәбез 2  ел эчендә ба­рысын да өйрәнеп, эшенең остасына әверелде.  Ул мәҗбүри чараларны – әҗәтлеләрнең мөл­кәтенә арест салудан алып, чит илгә чыгуны тыюга кадәр – барысын да йогынтысы булырлык итеп куллана.

Суд приставлары эшендә иң авырдан башкарылганы – али­ментларны юллап алу. Бер үк вакытта ул иң мөһим юнәлешләрнең берсе дә булып тора.  Балалары  алдында җаваплылык тоймаган  сансыз әти-әниләр белән  эшләүдә Аяз Исмәгыйлов  зур тырышлык куя.  Түләнми  килгән  алиментларны,  шулай  ук җинаять эшләре буенча салынган   штрафлар эзләп алу,  мәҗбүри эшләргә  тартылганнар тарафыннан  түләүләрне тикшерү – болар барысы да аның  өстендә.  Гомумән, бердәм коллективка үз эшләрен яхшы белгән юристлар,  хезмәткәрләр  генә җыелган”,– диде безгә  Саба һәм Теләче районнары  буенча суд  приставлары  бүлеге җитәкчесе  Айгөл Бикмуллина.

Бүлектә  10  елга  якын   эш­ләүче Илүсә Минибаева бе­лән Динә Гыйниятова да үз  ва­зифаларының осталары. Бер­се счетлардан  кергән  суммаларны акчаларны  программага куеп, тиешле адресатларга   җибәрү белән  шөгыльләнсә,  икенчесе  барлык  кергән документларны учетка  алып,  үтә­тү документларын,  суд  ка­рарларын теркәү, компьютер программасына   кертү опе­ра­цияләрен төгәл башкара.

“Кушылганны   төгәл белеп оператив үтиләр.  Хезмәтебезгә карата ризасызлык белдерүчеләр  булганы юк”,– ди Айгөл Бикмуллина  алар турында.

Коллективның хезмәт  күрсәт­кеч­ләренә килгәндә, уңай нәти­җәләр барлык  юнәлешләрдә дә  бар. Агымдагы  елның 9 аенда  ба­рысы 4450 башкару документы буенча эш төгәлләнеп, 52,870 мил­лион сум акча кергән. Аерым алганда, физик затларның торак-коммуналь хуҗалык пред­прия­тиеләре файдасына барысы 678 мең сум күләмендәге бу­­рычларын түләттерелгән.  Башкару документларының социаль әһәмиятле категорияләре арасында  балалар хокукларын яклауга бәйле эшләр  аерым  урын  алып тора. 2023 елның 10 аенда бурычлы  кешеләрдән 4,5 милион сум акча эзләп алынуы да шуңа бер мисал. Административ хокук бозулар турындагы Россия Федерациясе кодексының 5.35 статьясы 1нче бүлеге буенча 16 беркетмә төзелгән. Мисалга, баласына  294  мең сум бурычы булган С.  административ җаваплылыкка тартылганнан  соң рәсми рәвештә эшкә урнашып, алиментын түли башлаган.

Бурычлы  затларга  карата  суд приставлары тарафыннан  бурычны  түләү хисабына шәхси  мөлкәткә арест  салу, күчемсез милекне теркәүдән тыю, банк  счетларына  арест  салу,   чит  илләргә  чыгу, транспорт белән идарә итү  хокукын  чикләү, җинаять  җаваплылыгына тарту  чаралары  да  куллана ала.  Мәсәлән,  явыз ният белән алимент түләмәүче 2 ата-анага җинаять эше  кузгатылган.    Бурычлы затларның мөл­кә­­тенә арест  салу буенча 104 акт  тө­зелгән.

Кеше кайвакыт  бурычлары бар­­лыгы (әйтик, түләнмәгән штраф) турында белми  калырга  да  мөмкин. Бурычларыңның  бу­лу-булмавы турында суд прис­тавлары  федераль  хезмәтнең рәсми  сайтында ачыкларга бу­ла.  Моның  өчен сайтта “Башка­ру производстволарының мәгъ­­лү­мат банкы” ресурсы  яр­дәмендә тиешле урыннарга исем-фа­милияңне, әтиеңнең исемен һәм туган  көнеңне  кертергә  кирәк.  Бурыч булган  очракта барлык  мәгълүматлар  да  килеп  чыгачак.  

 Әлбәттә, иң  яхшысы әҗәтләрсез  яшәү. Ул  чагында приставлар ишек  какмас.