Раиф Шиһабиев: «Намус белән эшләдем, намус белән яшә­дем»

 Юбилярны элеккеге  хезмәттәшләре Николай  Димитриев, Мәгъсум Галиуллин,  Кәримулла Гатауллин,  ветераннар  советы рәисе Фәнил Ильясов  котлады.

Россия Федерациясенең ат­ка­зан­ган авыл хуҗалыгы хез­мәт­кә­ре    Раиф Сәмигулла улы  1948 ел­ның 18 ноябрендә Саба районы Баландыш  авылында туган.   Югары  белем  (галим-агроном) ала. Хезмәт юлын 1969 елда Явлаштау авылында (Калинин исемендәге  колхоз) агроном булып башлый. Биредә   тәҗрибәле рәис, ике тапкыр Хезмәт Кызыл Байрагы ордены кавалеры Габделнур Җәлилов мәктәбен уза. Игенчелек  культуралары уңышын күтәрүгә яшь белгеч-агрономның да күп  хезмәте  керә. 1972 елның көзендә ул авыл хуҗалыгы һәм азык-төлек идарәсе начальнигы тәкъдиме белән район дәүләт орлыкчылык инспекциясенә җитәкче итеп билгеләнә. Җиң  сызганып эшкә  алына: район хуҗалыкларында чәчүлек орлык чималының  сый­фатын яхшыртуга   күп   көч  куя. Раиф Шиһабиев  1982 елда Шекше, Алан-Елга,  Сәрдә авылларын берләштергән  «Ирек» колхозына  рәис итеп билгеләнә. Ул хуҗалыкны икътисадый яктан түбән тәгәрәгән бер чорында кабул итеп ала.  Төп табышны терлекчелектән  алырга тиешле колхозның нибары 36 гектарда  күпьеллык үлән басуы була. Эшне рәис терлекләргә ныклы азык базасы  булдырудан башлый. Нә­тиҗәдә күпьеллыкларның мәй­даны  1000 гектарга җитә. Бөр­тек­леләрнең гектар уңышы да 30-35 центнерга күтәрелә.

Югары оештыру сәләтенә ия булдыклы  җитәкче Тимершык авылы  елъязмасында  да  матур сәхифәләр калдырды. Ул биредәге күмәк предприятиегә хакимият кушуы буенча 1999 елда  «Ирек» колхозында, шулай ук «Татрапс» акционерлык җәмгыятенең  Сабадагы пунктына нигез салганда тупланган бай тәҗрибә багажы белән килә.

“Мин хуҗалык  җитәкчесе итеп  билгеләнгәндә  уракка әзерлек бара, хәл итәсе мәсьәләләр күп иде. Игенче-механизаторларның тырышлыгын уңыш язмышын хәл итүгә тупладык. Терлекләрнең баш санын арттыру  өчен аерым ху­җа­лыклардан  да тана  бозаулар­  җыйдык. Агроном  Нурислам  Хә­бибуллин белән  берлектә нык­лы  азык  базасын булдыру, җирнең уңдырышлылыгын  арт­­­тыру өчен файдаланылмаган  мөмкинлекләрне барладык. Нә­тиҗәдә  мөгезле  эре тер­лек­ләрнең санын өч  ел  эчендә  1600 башка  җиткердек, – дип  сөйли Ра­иф Шиһабиев.

“Тимершык” пред­приятие­сен­дә төзелеш эшләре дә  киң  ко­лач белән  алып барыла. 2003 ел­да  “Тимершык” предприятие­се  фермасына  республикада беренчеләрдән булып  “ДеЛаваль” сөт саву  җайланмасы урнаштырыла. Катнаш  азык  эшләү  цехы, буаз  сыерлар   өчен аерым тудыру  бүлеге төзелә. Күрелгән  чаралар терлекчелек продукциясе җитештерүне арттыруга  зур  йогынты  ясый.   2003 елда ферма  коллективларының  уртак тырышлыгы белән һәр сыердан  уртача 5000 литр сөт савып  алына, аннары  бу   күрсәткеч  6000 литрга  кадәр җитә.  Раиф  Шиһабиев  “ДеЛаваль”  технологиясен өйрәнү өчен Татарстан делегациясе составында 15  көнгә Швециягә дә барып кайта.  Шуннан соң хуҗалыкка швед тәҗрибәсе  кер­телә, азык заманча алымнар бе­лән әзерләнә. Предприятиенең  ны­гыганын   күреп, 2003 елда “Ти­мершык”ка  бөтен әҗәтләре, түләнмәгән салымнары белән "Мишә" һәм "Алга" хуҗалыкларын да кушалар. 2004  елда  “Делаваль” саву җайланмасын  пропагандалау  максатында  Тимершыкта Татарстан  Президенты  Минтимер Шәймиев  катнашында республика семинары үткәрелә.  Хезмәтне оештыру югары  бәяләнә,   яңалык республика  районнары  башлыкларына җиткерелә. Нәтиҗәдә “ДеЛаваль” республикада киң  таралды.

“Бу  эшкә  керешкәнче  хуҗалыкның икътисадый  хәле  җиңел түгел  иде. Райондагы бар­лык оешмаларга да, сөт комбинатына  да бурычлар күп. Сөт җитештерүне  арттырып,  мөгезле  эре терлекләрдән артым алуны  яхшыртып әҗәтләрне түли  алдык.  Әлбәттә, планлаштырылган эшләрдә һәм  аларны уңай  хәл итүдә район башлыгы  Рәис Нургалиевичның    ярдәме  зур  бул­ды”, – ди Раиф Шиһабиев.

Ул “Тимершык”  предприя­тие­се  белән  җитәкчелек иткән 1999-2008 елларда   социаль объ­ект­лар   да яңартыла. Хуҗалык исә­бенә җирле үзидарәләр арасында беренчеләрдән булып йорт­лар  телефонлаштырыла. Хез­мәткәрләренең  шәхси яр­дәм­че хуҗалыгын ныгытуга да зур игътибар бирелә.

“Мин эштән дә  уңдым, тормышымнан да ка­нәгатьмен. Һәр эш-гамәлем гомумхалык файдасына, кешеләр мәнфәгатендә булды, чөнки гаи­ләм өчен якташларым алдында йөз кызарырлык түгел. Намус белән эшләдем, намус белән яшә­дем. Район үсешенә кулдан кил­гәнчә үз өлешемне керттем”, – ди  Раиф Сәмигулла  улы.