Район яңалыклары

«Саба» диюгә, Шәүкәт абый күз алдына килә» [+фоторепортаж]

Фәридә Вилданова, 4 декабрь 2022 - 08:00

513

Шәүкәт Биктимеров исемендәге балалар сәнгать фестивале быел унынчы тапкыр узды

❮ ❯

«Саба» диюгә, Шәүкәт абый күз алдына килә» [+фоторепортаж]

Районыбыз 28 ноябрьдә республиканың яшь театр сөючеләрен кабул итте. Легендар артист Шәүкәт Биктимеров исемендәге театр сәнгате конкурсына барлыгы 31 театраль өзектән видеоязма тәкъдим ителеп, шулар арасыннан тугызы йомгаклау этабында катнашты. Фестивальдә Казан шәһәре, Әтнә, Теләче районыннан килгән театр сөючеләр белән бергә, районыбыздан финалга узган “Яшь талантлар” (Саба гимназиясе), “Күңелле сәхнә” (Олы Кибәче урта мәктәбе), “Кояшкай” (Тимершык урта мәктәбе), «Мизгел» (сәләтле балалар мәктәбе), "Балачак" (Эзмә урта мәктәбе) театр коллективлары катнашты. Бәйгенең төп максаты талантлы актерны зурлау, исемен мәңгеләштерү булса, шул ук вакытта сәләтле балаларны барлау, үстерү буенча да роле бәһасез. Жюри әгъзалары арасында икенче ел Г.Камал исемендәге Татар дәүләт академия театрының халык, атказанган артистлары Венера Шакирова һәм Олег Фазылҗанов булуы әлеге бәйгенең җитдилеген дә күрсәтә иде. Яшь театр сөючеләрне иң элек башкарма комитет җитәкчесе урынбасары Илнур Котдусов сәламләп, якташыбыз Шәүкәт Биктимеровның якты истәлеген хөрмәтләп килгән һәр коллективка зур рәхмәт сүзләре җиткерде. "Бу чараны быел беренче тапкыр Россиянең милли проектлары буенча төзелгән яңа заманча мәктәптә уздырабыз. Шәүкәт Биктимеров - Саба районын Россиядә генә түгел, күп илләрдә таныткан кеше, ул безнең горурлыгыбыз. Сезнең арада да бөек сәхнә осталары үсәр дигән зур өметтә калабыз", –диде Илнур Илдус улы. Дөрестән дә, бер-бер артлы зур осталык белән чыгыш ясаган театр коллективларын күрү театр сәнгатенең киләчәге өметле булачагына ышандырды.

Фестиваль бер елны да Шәүкәт Биктимеров иҗатында аерым урын алып торган "Әлдермештән Әлмәндәр" спектакленнән башка узмый. Г. Камал театрына 60 ел гомерен багышлаган артистка әлеге роль өчен 1979 елда К.Станиславский исемендәге Дәүләт бүләге бирелә. Күренекле якташыбыз Туктамыш ханнан алып Ленинга кадәр 150дән артык образларны гәүдәләндерә. Т.Миңнуллинның "Әлдермештән Әлмәндәр"е 30 елдан артык зур уңыш белән барып, Ш.Биктимеров сәхнәдән киткәннән соң гына репертуардан алына. Фестивальдә әлеге спектакльне зур осталык белән башкарган Сәләтле балалар мәктәбенең "Мизгел " театр коллективы (җитәкчеләре Әнисә Ганиева һәм Ләйсән Шәмсетдинова) зурлар төркемендә 1 урын иясе булып танылдылар. "Мин кечкенәдән спектакльләр карарга яратам. Түгәрәккә икенче елымны йөрим. Узган ел да беренчелекне алган идек. Башта легендар Әлмәндәр роле бераз куркытты. Аннан соң үземне җиңәргә тырыштым. Барысы да үземнән тора икәнлеген аңладым. Үлемсез Әлмәндәр образын Шәүкәт Биктимеров уйнаган әлеге спектакльнең язмасын күп тапкырлар карарга туры килде", – ди 11 сыйныф укучысы Нургиз Мәүләвиев.

Күп коллективлар Туфан Миңнуллин әсәрләренә мөрәҗәгать иткәннәр. Кечкенәләр төркемендә чыгыш ясаган "Балачак" театр коллективы танылган драматургның "Иптәш командир" пьесасын сәхнәләштереп, 2 урынга ия булды. "Эзмә урта мәктәбендә драма түгәрәге беренче елын гына эшли. Барысы 15 бала йөри. Республикакүләм «Сәйяр» татар яшьләр театр бәйгесендә Әтнәдә чыгыш ясап кайттык. Бүген дә укучыларым чыгышыннан бик шатмын", – ди җитәкчеләре, педагог-оештыручы Нәфисә Җиһаншина.

Жюри әгъзалары даһи сәхнә остасының туган ягында зур масштаблы фестиваль узуын мактауга лаеклы зур хезмәт дип бәяләделәр. "Балаларның чыгышларына карап без татар театры киләчәге өчен сөенәбез. Аларның кечкенәдән телебезне, театрны яратып үсүе милләтебез өчен бик куанычлы күренеш. Шәүкәт абый да моңа бик сөенер иде. Ул искиткеч кеше, сәхнәдә гаҗәеп партнер булды. Аның янәшәсендә начар уйнап булмый иде. Без аны актер буларак кына түгел, кеше буларак та бик сагынабыз, юксынабыз. Мондый фестивальне оештыручыларга зур рәхмәт", – диде Венера Шакирова. "Саба" диюгә, Шәүкәт абый күз алдына килә. Аның белән "Миңкамал" спектаклендә бергә уйнадык. Шушы балалар арасыннан тагын бер Шәүкәт Биктимеровны күрәсе килә",– дип өстәде Олег Фазылҗанов. Мөхтәрәм артистларыбыз үз рольләрен аеруча яхшы башкарган яшь театр сөючеләргә академия театрының махсус бүләкләрен дә тапшырдылар.

Следите за самым важным и интересным в Telegram-каналеТатмедиа

Без социаль челтәрләрдә: Телеграм, ВКонтакте, ТикТок, Ютуб, Одноклассники, Твиттер, Яндекс.Дзен