Саба – терлекчелек тармагында әйдәп баручы районнарның берсе

Бүген Татарстан Премьер-министрының беренче  урынбасары Роман Шәйхетдинов  2024 ел йомгаклары буенча үткәрелгән Саба районы Советы утырышында катнашты. Сессия  районның хисап  чорын социаль-икътисади үсеш йомгакларына һәм быелгы бурычларга багышланды.

    Еллык эшчәнлеккә хисап тотып, Совет рәисе, район башлыгы Рәис Миңнеханов  икътисади потенциал нигезендә районның ныклы үсеш алуын, моңа инвесторларны да җәлеп итүне ассызыклап, милли проектлар һәм республика программаларын тормышка ашыру барышын бәян итте. 2025 елга эшчәнлекнең төп юнәлешләре билгеләнде.

    Һәр  яңа ел үзенең үзенчәлекләре белән  өстенлекле бурычларны билгеләүгә төзәтмәләр  кертә. Махсус  хәрби операция башланганнан бирле Ватаныбыз мәнфәгатьләре, алгы сызык белән тыл бердәмлеге күпчелек рәсми чыгышларның прологына  әверелде. “Иң  мөһиме, хәзер без барыбыз да бергә илебез  сагында торабыз. Якташларыбыз хәрби операциядә үз бурычларын геройларча  үтиләр. Ә безнең  бурыч – аларга төрле  яклап  булышу, гаиләләренә кулдан  килгәнчә  ярдәм   күрсәтү. 2024 елда җирле бюджет хисабыннан 3 миллион 36 мең  сум  күләмендә СВОда катнашучыларның балаларын бакчага  йөрткәнгә ата-аналар  взносы, мәктәптә тукланулары өчен түләүләр  финансланды. Спорт  учреждениеләренә, мәдәни-массакүләм  чараларга  түләүсез  керүләре оештырылды. Барысы 30 миллион сумлык гуманитар  ярдәм җибәрелде. Бу эшкә битараф булмаган кешеләргә, эшмәкәрләргә, предприятиеләргә, волонтерларга, транспорт белән  ярдәм итүчеләргә зур рәхмәтемне белдерәм. Халык, хәйриячеләр шаулап  йөрми, ди. Арабызда без белмәгән игелекле  кешеләр дә бар. Алар тыйнак  кына,  үзләрен  күрсәтмичә, гуманитар   йөк  җыя,  алгы  сызыкка илтә. Бу тагын бер тапкыр безнең  барлык гражданнарның СВОдагылар  өчен борчылып  яшәүләре турында   сөйли. Без аларга һәм гаиләләренә алга таба да ярдәм итәчәкбез”,– диде район  башлыгы.      

Чыгышта үсеп  килүче  буынны патриотик рухта тәрбияләү мәсьәләләренә зур  урын бирелде. Ватанпәрвәрлеккә игътибарны нык  арттырырга  кирәклеген  өлешчә  мобилизация барышы  да раслаган.  Рәис Миңнеханов җәмәгать оешмаларына, “Яшьармиячеләр”, “Беренчеләр” хәрәкәтенә, массакүләм  мәгълүмат чараларына армиядә  хезмәт итүнең өстенлекләрен активрак пропагандаларга, мәгариф  идарәсенә, хәрби комиссариатка, “Сугышчан туганлык” берләшмәсенә  мәктәпләрдә сугышчан хәрәкәтләрдә  катнашучылар белән очрашуларны  ешрак  үткәрергә кушылды.

Үсеп килүче буын дигәч, балалар белән гаиләләр   күз  алдында тотыла. Бу  тема һәрвакытта  актуаль. Район башлыгының эшен бәяли торган төп күрсәткечләрнең берсе – ул туучылар саны. Соңгы елларда дөньяга килгән балалар саны бер тирә. Ләкин 90нчы еллар белән чагыштырганда, бу күрсәткеч сөенерлек түгел. Елдан-ел бер бала да тумаган авыллар саны арта бара. 2023 елда –11, былтыр 19 авылда бер сабый дөньяга килмәгән.  Бу фактлар уйланырга мәҗбүр итә. “Күп балалы гаиләләргә ярдәм итәбез. 2024 елда район бюджетыннан, күп балалы гаиләләрдә бала туганда һәм аларның балаларын мәктәптә түләүсез ашатуга барлыгы 6,450 миллион сум акча тотылды”,– диде район  башлыгы.

   Сессиядә  катнашучыларга  җиткерелгәнчә, социаль бурычларны чишүнең  нигезе –икътисадны үстерү. Муниципаль районнарның икътисадый үсеше рейтингында Саба хәзер 16нчы  урында.  Былтыр 4нче  позициядә булган. Төяп озатылган  продукция  күләме  буенча дүртенче унлыкта. Күрше Балтач, Кукмара, Арча районнары бездән алда. Сәнәгать җитештерүе индексы 94,7 процент тәшкил иткән. “Иген” кооперативында, “Восточный”, “РАФФ” җәмгыятьләрендә эшләп  чыгару күләме кимегән.

“Җитештерүне  арттыру резервы – индустриаль паркларны үстерү. 2028 елга сәнәгать җитештерү күләмен 11 миллиард  сумга  җиткерү бурычын  куям. Моның өчен районда шартлар  бар. Роман Александрович! Безнең сәнәгать паркларында резидентлар  өчен шартлар шәһәрнекеләрдән берни белән дә аерылмый. Инвестор үзенең производствосын  кайда отышлы шунда урнаштыра. Аларны  авыл районнарына җәлеп итү  өчен аларга ташламалар бирү мәсьәләсен республика җитәкчелеге каравына кертүегезне  сорым”,– диде район башлыгы  Премьер-министр  урынбасарына  мөрәҗәгать итеп.

  Рәис Миңнеханов шулай ук агросәнәгатьне үстерү мәсьәләләренә  дә киң тукталды. Терлекчелектә сыерлардан  көндәлек  савымны 400 тоннага җиткерү, Явлаштауда 390 башка исәпләнгән сөт комплексының беренче, Ике басу Арташта 360 башлык  комплексның икенче чиратын файдалануга тапшыру, “Курсабаш”та  терлек  азыгы  үзәген, “Игенче”дә бозаулар корпусын төзеп бетерү бурычы  куелды. Игенчелектә бер гектарга исәпләгәндә акча керемен  арттыру шарт.  2024 елда район буенча 40 процент оригинал һәм элиталы симәнәләр чәчелгән. Шул ук  вакытта әлеге  күрсәткечне 78 процентка кадәр җиткергән районнар   бар. Авыл хуҗалыгы идарәсенә орлык материалының сыйфатын  күтәрү юнәлешендә эшләргә, элиталы симәнәләр  куллану 70 процентка җиткерергә  кирәк диелде.  Болардан тыш сәламәтлек  саклау, мәгариф, мәдәният,  спорт өлкәләрендә дә хәл итәсе бурычлар  билгеләнде.

Соңыннан сүз Роман Шәйхетдиновка бирелеп, ул үзенә җиткерелгән ташламаларга  кагылышлы тәкъдимнәрнең контрольгә  алыначагын, федераль дәрәҗәдә өйрәнү мәсьәләсенең каралачагын белдерде.  Инвесторларны республика территориясе буенча  тигез  бүләргә  кирәклеген ассызыклады. 2025 елда биш  федераль проекттан торган яңа “Гаилә” милли проектын гамәлгә ашыру башланачагын искәртеп, әлеге  юнәлешләрдә максатчан эш оештырырга тәкъдим итте. “Бүген Сабада менә дигән  музей  ачтык.  Бу  мәйданчык зур булмаса да,  кызыклы  технологик чишелешләр табылган. Яшь буында үткәннәргә кызыксыну уятырга,  экскурсияләр оештырырга   була. Бөек Җиңүнең 80  еллыгы алдыннан да бу зур әһәмияткә ия”,– диде Премьер-министр  урынбасары.

Соңыннан Роман Шәйхетдинов районның хезмәт  алдынгыларын Мактау грамоталары, Рәхмәт хатлары белән бүләкләде.