Шәмәрдәндә яшәүче Серафима Гордееваны 90 яшьлек юбилее белән котладылар

  Серафима Андреевна Кукмара районы Сәрдәүч авылында туган. Туган авылында башлангыч белем алган. Озак еллар Шәмәрдән мех комбинатында хезмәт куйган. 1951 елда шәмәрдәнле Иван Филипович белән гаилә корганнар, 4 бала тәрбияләп үстергәннәр. Лаеклы ялга киткәнче, Серафима Андреевна сак бүлегендә эшләгән. Кайда гына хезмәт куйса да, үз эшенә һәрвакыт намус белән, җаваплы караган. Аны авылдашлары хезмәт сөючән, ачык күңелле, кайгыртучан, мәрхәмәтле булганы өчен хөрмәт итәләр. Бүгенге көндә Серафима Андреевнаның 11 оныгы, 8 оныкчыгы бар. Ул Шәмәрдәндә кызы Александра Гарипова тәрбиясендә яши.