Тырыш хезмәт – уңыш нигезе

Көз  җиткәч,  басу-кырлардагы,  терлекчелек фермаларындагы эшләргә йомгак ясау, табыннарыбызны Галиҗәнап икмәк, ит-сөт белән баетучыларга олы хөрмәтебезне  белдерү – иң күркәм традицияләребезнең берсе.  Агымдагы атна республикада  шушы  чараларга  багышлана. Бәйрәмнәре   уңаеннан  авыл  хуҗалыгы  һәм азык-төлек ида­рәсе  начальнигы  Гафур  Хә­сәншинның газета  укучыларга тармак  эшчәнлегенә кагылышлы  чыгышын, теләк­лә­рен җит­керәбез.

“Елның авыл  хуҗалыгы  һәм эшкәртү  сәнәгате  хез­мәт­­кәр­ләре  көне  билгеләп  үтелгән унынчы  аена  кердек. Аграрийлар өчен гаять кие­­ренке өч квартал артта калды. Кыр эшләре быел ир­тәрәк төгәлләнгәнлектән, ин­де бүгеннән игенчелек тар­­магына тулаем анализ ясар­га була. Хуҗалыклар эш­чәнлегенә шушы яктан якын  килгәндә, беренче чират­та сезон үзенчәлекләрен исәпкә алырга кирәк. Табигать шартлары бер елныкы белән дә чагыштырырлык булмады. Мондый коры, югары температуралы җәйне хәтта аксакаллар да хәтерләми. Кыскасы, район хуҗалыклары җитәкчеләре, белгечләр, иген­че-механизаторлар иген­че­лектә кулланыла торган технологияләргә нигезләнгән хезмәтне бик тә уңайсыз һава шартларына яраклашып оештырдылар. Бер гектарга тәэсир итүче матдәләрдә 115 килограмм аш­лама кертелде, фунгицид­лар, гербицидлар куллану технологияләре үтәлде. Бер­ничә мәртәбә үсемлекләр яфрактан тукландырылды. Агротехника таләпләренең җиренә җиткерелүе, эшкә җаваплы караш нәтиҗәсендә елына карата чагыштырмача югары уңыш җыеп алынды. Гектар чыгышы район буенча уртача 32,7 центнер тәшкил итте. “Мөхәммәтшин” крестьян-фермер хуҗалыгында, “Нырты” предприятиесендә, “Сатыш” бүлекчәсендә, Явлаштау бригадасында күрсәткечләр чагыштырмача югары булды.

Мал азыгы культураларына килгәндә, сөрү җирләренең яртысыннан артыгында тер­лекчелек культуралары үс­терелә. Әлеге мәйданнарда планлаштырылган  күләмдә җитештереп бетерелми калган сенаж һәм печән арендага алынган  җирләрдән һәм чит төбәкләрдә әзерләнде. Былтыргы запаслар белән бер баш шартлы терлеккә 30 центнер күләмендә азык туры килә. Билгеле, хезмәт чыгымнары, ягулык бәяләренең артуы һәм уңышның планлаштырылган күләмдә җыелып бетмәве үзкыйммәтне нык күтәрде. Әйтик, язгы кыр эшләре вакытында солярканың килограммы 45 сум булса, урып-җыю чорында 80,50 сумга җитте. Шулай итеп, 1 центнер  ашлыкның үзкыйммәте 831 сум булыр дип көтелә. Былтыргы запас булганлык белән ашлыкка сорау кимеде. Кайбер хуҗалыклар ашлыкны базар бәяләре белән сата алмады. Мисал итеп китергәндә, былтыр “Туган як” җәмгыяте бодайны 13392 сумнан сатса, быел бәя 9090 сумга калды. Димәк, акча кереме 32 процентка кимегән дигән сүз. Илдәге финанс-икътисадый вәзгыять безнең хуҗалыклар эшчәнлегендә әнә шулай тис­кәре чагылыш таба.

Терлекчелек тармагында да шундый ук хәл. Мәгълүм булганча, хуҗалыклар кассасына акчаның 85 проценты сөт сату исәбеннән керә. Быел 9 айда район буенча 82,7 мең тонна, ягъни былтыргының шушы чоры күрсәткеченнән 5 процентка күбрәк сөт җитештерелде. Төгәлрәк әйткәндә, Саба районында былтыргыдан 4 тоннага артыграк сөт савыла. Фактта узган елдагыга караганда сөтне артыграк сатабыз. Бер килограмм продукциянең үзкыйммәте артып, 23,58 сум тәшкил итте. Сату бәясе узган елдагыдан 7 сумга кимеп, уртача 27,88 сумга калды. Менә шушы шартларда елны вакытында хезмәт хакларын биреп, бурычларны һәм салымнарны түләп төгәлләү төп мәсьәлә булып тора. Хәзерге вакытта авыл хуҗалыгында бер эшчегә уртача 36446 сум хезмәт хакы түләнә. Сөт, ашлык сатудан керем алынып бетмәве сәбәпле, түләү былтыргыга караганда бары 7 процентка гына артты. Шушы шартларда хуҗалыкларның фи­нанс хәлен тотрыкландыру өчен терлекчелектәге ре­зерв­лардан файдаланып, җи­тештерү чыгымнарын ки­метү чаралары күреп, хез­мәтне комплекслы оештыру­га ныграк игътибар бирү сорала. Заман таләпләренә ияреп, тех­нологияләрне ка­мил­лләштерү, цифрлаштыру өлкәсендә нә­тиҗәле  эш алып барырга  ки­рәк булачак. Әле­гә башка мөм­кинлекләр  күренми.

Җыеп әйткәндә, авыл ху­җа­лыгы хезмәтчәннәре үз­лә­ренең һөнәри бәйрә­менә катлаулы шартларда ирешелгән уңай эш күрсәткечләре белән килә. Күпмедер үсеш бар һәм без уңган игенчеләр, тер­лекчеләребез, тармакка хез­мәт  күрсәтүчеләр белән горур­лана алабыз. Уңыш бәйрәме, елдагыча, матур традициягә ни­­гезләп үткәреләчәк. Ал­дын­­гыларга район башлыгы, башкарма комитет та­ра­­фыннан булдырылган ярыш шартларында каралган­ бү­ләкләр тапшырылачак. Иң  мөһиме, хезмәтне сак­­­лау та­ләпләренең үтәлүе, бә­­­хет­сезлек очракларының булмавы. Барыбыз да исән-саулар һәм фермаларда, кырларда, паркларда эш дәвам итә. Бүгеннән үк киләсе ел уңышы язмышы кайгыртыла, соңгы кварталны тагын да яхшырак үсеш  күрсәткечләренә ирешеп тәмамлау бурычы тора.