Үзара салым җыю программасы муниципаль берәмлек­ләрнең финанс хәлен яхшыртуга ярдәм итте

2020 елда исә бу  күрсәткеч 29,5  миллион  сум  иде. Республика бюджетыннан бүленгән  сумманың  артуына үзара  салым җыюның 300дән 500  сумга  күтәрелүе ярдәм итте.

Планлаштырылган  эшкә  ка­рап җыеннарда меңәр сум акча бирү турында  карар кабул иткән авыллар да бар. Бил­геле булганча, Татарстанда үзара салым 4 тапкыр арттырып өстәмә  финанслана. Татарстан Хөкүмәте өстәмәсә, районда быелга  күздә тотылган эшләргә 13,6 миллион  сум гына акча җыеласы  иде.

Хәзерге вакытта авылларда үзара салымга урам юллары төзекләндерелә, обелисклар, балалар мәйданчыклары тө­зелә-яңартыла, зиратлар тәртипкә китерелә һәм башка эшләр башкарыла. Гомумән, һәр авыл җирлеге үзара салымны нинди максатларга тотасын  авыл җыеннарында, халык  белән  киңәшеп  хәл итте. Быел да өстенлек урамнарны төзекләндерүгә бирелә. Тендерны куәтле техникасы һәм үзенең таш карьеры булган “Рамазан” җәмгыяте отты. Без оешманың юл төзүчеләре белән Курсабаш авылында эш  алып барганда сөйләштек. Аңарчы  бригада Нырты, Иштуган, Шекше, Явлаштау  авыл җирлекләренә кергән торак пунктларының җирле әһәмияттәге автомобиль юлларына вак таш салган. “Сезонны башлаганга бер  ай. Байтак  еллар  дәвамында тупланган тәҗрибәгә таянабыз. Технологиягә   килгәндә, өске грунтны тигезләп алганнан соң, иң элек бүлеп  алынган  участокка  20  сантиметр калынлыкта  ком  таратыла һәм тыгызлана. Аннары шуның  өстенә 40ка 70ле фракцияле таш салына. Иң  өске  катлау 20гә 40лы  вак таштан тора. Киңлеге дүрт һәм биш метрга  кадәр булырга  мөмкин. Юлның ныклыгы ташны тиешле дәрәҗәдә таптатуга бәйле. Бу  эшне 13 тонналы катокта башкаручы Камил Кәримуллин сыйфатка нык игътибар бирә. Инерт материалларны Фәнис Гатауллин “ДжонДир” чүмече белән юлга тигезләп тарата.  Фәнис  Төхбәтуллин, Илдус Галиев “Хундай”ларда ташны Көек карьерыннан ташып өлгертәләр.  Курсабашта эш беткәч, шушы  җирлеккә  кергән башка  авылларга керәбез”,– ди мастер Рәмиз Гәрәев.

  Үзара  салым җыю программасы  муниципаль берәмлек­ләрнең финанс хәлен шактый яхшыртты. Әйтик, Курсабаш авыл җирлегендә халыктан 240 мең сум җыйналса, республика бюджетыннан дүрт­­ләтә арттырылгач 1,2 мил­лионга җитте. Акча “һәр авылныкы үзенә” принцибы буенча бүленә. Мисалга, сайлаучысы 270 кешеле Курсабашта 675 меңгә 162 метр урам юлына вак таш түшәлә. Халык уңай үзгәрешләрне һәрчак хуп­лый гына. “Курсабашка килен булып  төшкән 1966 елларда урам пычрагын  ерып йөр­дек. Балчык галошка түгел, озын кунычлы  резин итеккә керә  иде. Хәзер урамнар ел  саен  100-150 метрлап тө­зек­ләндерелә. Туфли белән  йө­рибез”,– дип шатлана Ания Хәй­­­ретдинова. Аларның  йорты урнашкан урамга таш былтыр  җәелсә, быел   яңа барлыкка  килгән Төзүчеләр урамы нормативта  каралган хәлгә китерелә. Биредәге арендалы торак программасы буенча  салынган 4 йортны игезәкләр диярсең. “Әле  февраль аенда гына  күчкән  идек. Юлсызлык читенлеген яз көне тойдык.  Инде менә урамыбызга таш та  салынгач,  машина белән иркенләп кереп-чыгып йөри  алачакбыз”,– ди “Курсабаш” җәмгыятендә терлекчелектә эшләүче Илсур Мөбарәкшин.

 Җирлекнең башкарма  комитетында әйтүләренчә, Тү­бән Утарда Муса Җәлил – 84, Өчиле, Югары Утар авылларында Татарстан һәм  Мирная  урамнарына 15-16шар метрда  вак таш  салыначак