Җилләткечләрне дөрес куллан!

Соңгы вакытта районда салкын тидереп  авыручылар  саны кү­­бәй­гән.  Әйтик, поликлиникада был­тыр­ның 16 маеннан 16 июньгә кадәрге арада 114 кешегә ОРВИ диагнозы  куелган  булса, быел  шушы  чорда 182гә  җиткән. Ягъни ике тапкыр  диярлек  арткан. Моңа  кондиционерлар  да сәбәпче.  Нилектән шулай  килеп  чыга? Әллә алардан бөтенләй баш тартыргамы?  Әлеге  сорауга үзәк хастаханәнең эпидемиология  мәсьәләләре буенча баш табиб  урынбасары  Резеда Фәттахова  җа­вап бирә.

“Машинадагы  һәм  йортлардагы кондиционерлардан  салкын беренче  чиратта иммун  системасы  йомшак, сулыш органнарында хроник  авырулары булган  кешеләргә тия һәм симптомнары белән ОРВИдан  аерылмый. Кондиционер  эшләгәндә һаваның  дымлыгы  кими,  борындагы лайлалы тышчаны киптерә һәм  инфекция  барьеры җимерелә. Җилләтүдән  аермалы буларак,  йомык цикл белән  эшләүче кондиционерлар янында  кислород җитәрлек дәрәҗәдә булмый, нәтиҗәдә ор­ганизмның  саклагыч  үзлеге  кими. Салкын һава агымының тирегә тәэсир  итүе невралгия һәм миозитка китерергә  мөмкин. Акрынлык  белән җил­ләткечләрдәге  филь­трда аллергеннар,  вируслар, гөм­бәчекләр да туплана. Пычрак кондиционер эшләгәндә   кабинада һәм  бүлмәдә күгәрек микроблары, тузан талпаннары  саны  да арта. Шуңа   күрә алардагы  фильтрларны даими  алыш­тырып торырга   кирәк.

Бу, әлбәттә, җилләткечләрдән баш тартырга дигән   сүз түгел. Алардан  дөрес  файдаланырга гына  кирәк. Чөнки  югары температура да организм өчен яхшы түгел. Иң элек температура  режимының  саклануы  мөһим. Урамда 30 градус  эссе булганда кондиционерны плюс 17гә кую салкын тиюгә  китерергә мөмкин. Шуңа   күрә кискен температура  аермасы ясарга һәм җилләткеч  алдында  ук утырырга,  йокларга  ярамый. Кондиционердан тигән салкынны бетерү өчен  ОРВИ вакытында  бирелгән препаратлар  кулланыла. Иң  мөһиме,   чирләмәү. Халык, җәй көне тигән  суык тиз генә бетми, дип юкка гына әйтми”.