Хайваннар дөньясында (уены-чыны бергә)
Ышанырдай нәрсә калмагач, халык гороскопларга ышана башлады. Гәҗит-журналларны алуга, иң әүвәл йолдызнамәдән үзеңнең хайваныңны эзләргә тотынасың. Инде белдерүләр аша танышырга теләгәндә дә, без йолдызнамә телендә язышабыз: “Фатирым бар. Кияүдә булмаган, 27 яшьлек Сукояр гаилә кору өчен бозылмаган Балык эзли. Адресым баганада”.
“Мин – Кәҗәмөгез! Буе – 180, биле – 90, авырлыгы 110 килодан артмаган Кыслага өйләнергә телим. Беренче һәм соңгы этажларны тәкъдим итмәскә”.
“60 яшьлек Сарык 35тән узмаган Бозауны йортка кертә...”
Бөтен кеше үзенә тиң, әйбәт хайван эзли. Кемдер Ат елында туган, кемнәрдер Юлбарыс, Куян, Маймыл, Дуңгыз...
Мин үзем Арыслан, егерме ел элек бер Бозауга өйләнгән идем – карт сыер инде ул хәзер... Үзенең өч бозавы бар әнә... Кеше хайваннардан башка яши алмый. Авыл җирендә яшәсә, абзарда мал-туар асрый. Ә шәһәргә күчеп килсә, фатир тутырып, зоомаркеттан хайван җыя башлый. Минем өч бүлмәле кетәклегемдә пропискага кермәгән биш хайван яши: песи, попугай, алтын балык, ташбака һәм хатынның әнисе – татарча әйткәндә, әби, ягъни мәсәлән... Фатир түгел – зоопарк! Әле базардан берәр шимпанзе алып кайтыйм дигән идем дә, хатын аркылы төште: нәрсәгә инде безгә ике маймыл, ди... Үзен белми... Ак песине ул алып кайтты. Кызганып инде... Вокзал ашханәсендә ачка үлә язган мескенем... Ак песи безнең өйдә дегустатор ул хәзер, әби пешергән ризыкны иң әүвәл аңа биреп карыйбыз. Кайвакыт ашаганнан соң, өчәр төн буе түбәгә менәлми, җанашым! Начар төркемгә иярмәсен дип, урамга чыгармыйбыз үзен. Туган көнен дә өйдә генә үткәрдек. Унҗиде песи җыелды, хуҗалар белән! И зурладылар Ак песине. Җиде килолы Муркаларын күтәреп, Ижауда яши торган баҗайлар да кайтканнарые... Яратабыз Ак песине, сөйләшә белмәгәне өчен яратабыз. Мырласа-мырлар, әмма ләм-мим! Юкса, ул бит гомер буе безнең аяк очында йоклый. Төнлә ни күргәннәрен түбәгә менеп сөйли башласа...
Тагын ташбакабыз бар, дидем, ташбака әбигә ияреп килде. Мин аңа ничә яшь икәнен белмим. Тыныч хайван икән үзе – кыш буе йоклый, ну, әби шикелле үк гырламый... Ташбакалар өч йөз елга хәтле яши, ди, имеш, әби менә шуны сынамакчы. Яшәр, яшәр, әбине әйтәм – кияүдән кияүгә генә йөри ул. Җиде кызы бар – шәһәр саен берәү. Миндәгесе – төпчек кызы...
Өч бүлмәле фатирыбызда бердәнбер импортный әйбер ул – попугай – тутый кош! Кош, имеш... Тутырган тавык, каклаган каз, бәлеш эчендәге үрдәк – менә болары кош, ичмасам... Ә тутый кош – настоящий хайван ул! Аны малаем алып кайтты, миңа үч итеп. Сүгенүеңнән биздерәм әле мин сине, ди. Әйе, мин артыгын ычкындырмыйм хәзер, аның каравы тутый кошыбыз сөйләшергә өйрәнде. Телевизор кабызсак, каршына килеп утыра да... тотына сүгенергә. Сүгендерә торган илдә яшибез шул...
Илебез череп баесын дисәк, сүгенүчеләргә налог түләтергә кирәк: җеннәрне сүксәң – йөз сум; авызга тисәң – ике йөз сум; анаңны сагынсаң – мең сум; ә хөкүмәтне сүксәң, ташлама булсын. Шулай итеп, эшләргә яратмаган федерацияне субъектлар алтынга күмәчәк. Штраф түләргә җиңелрәк булсын өчен, Рәсәй 500 һәм 1000 сумлык яңа акчалар чыгарды. Тиздән үзебезнең Татарстанда да яңа акчалар әйләнешкә керәчәк, ди, имеш. Ул акчалар: “адин минималка”, “адин пенсия”, “адин штраф” һәм “адин взятка” дип аталачак, ди.
Тәртип турында сүз чыккач, безгә хайваннардан үрнәк аласы бар әле, алар үзләренең хуҗаларыннан әдәплерәк. Аты-юлы белән сүгенә белми. Ачуланган хайванга үз ишен куркытыр өчен өч хәреф җитә: йә “р-р-р...” дияр алар, йә “ш-ш-ш...”, йә “с-с-с...” итәрләр. Ә безнең хатыннар ирләре белән әрләшә башласамы?.. Татар алфавитының 39 хәрефе дә җитми... Ах син ә!.. Син үзең х!.. Ә син б!.. Син ул п!.. Үзеңне бел, с... дип, хайван исемнәрен санап китәсең... “С” хәрефеннән соң хатын, кул астына эләккән беренче әйберне алып, башыңа тондыра – ул ташбака булып чыга, һәм син мозготрясение аласың, мозгаң булса... Ташбаканы кире очырасың... Хатынның селкенә торган мие юк, аның өч йөз яшьлек әнисе генә бар. Миңа үч итеп, әби аквариумдагы алтын балыкны тутый кошка ыргыта, мин, аңа үч итеп, тутый кош өстенә Ак песине ташлыйм. Әби хитрый ж... – ташбакасына ияреп, уртанчы кияүләренә китеп бара. Ак песи, безнең белән бәхилләшеп, түбәгә сыпыра. Хатын “ЧКБ” – ягъни чоланга кереп бикләнә. Җәйге ялга киткәндә, йорт хайваннарын кая куярбыз, дип баш ватасы юк – проблема ел саен әнә шулай үзеннән-үзе хәл ителә. Гауга чыккан икән – чыксын, борчылырлык нәрсәме?! Әрләшү бит ул – ялкау телгә физзарядка гына. икенче көнне гәҗиттән яңа гороскоп табып аласың. Анда минем ишеләргә тагын зоомаркетка кереп хайваннар сатып алырга киңәш ителә... Тормыш дигәнең гел бертөрле ул... Хайваннары гына алышынып тора.
Следите за самым важным и интересным в Telegram-каналеТатмедиа
Нет комментариев