Итле, яшелчәле ризык

Сабантуй рухы һәр өйгә үтеп керә:  дуслар, туганнар белән очраштыра,  кунаклар каршылау башлана. Һәрбер хуҗабикә бәйрәмгә тәм-том әзерләү кебек күңелле мәшәкатьләр белән яши. Бүген бәйрәм табынына әзерләргә тәмле дә , җайлы да булган салат рецепты  тәкъдим итәбез.  

Алдан ук сыер, тана яки үгез ите пешереп, төнгә шулпасында калдырырга. Иртән итне алып, савытка саламлап турап салырга. Болгар борычын да шулай ук турап, өстәргә. Шулай ук саламлап туралган кыяр һәм вак итеп туралган укроп өстәргә. Аерым савытта зәйтүн маена тәмләткечләр һәм уксус салып, салатка өстәп болгатырга. Өстәлгә зур булмаган салат савытларында бирергә.

Ингридиентлар: 200 грамм ит, 1 болгар борычы, 1 яшел кыяр, 1 уч укроп, 3 аш кашыгы зәйтүн мае, 1 чәй кашыгы алма уксусы, ярты чәй кашыгы тәмләткечләр.