Эссе көннәр озакка сузылырмы? — Синоптиклар фаразы

Гидрометеорология үзәге фәнни белгече Роман Вильфанд 2010 елдагы кебек озакка сузылган 30 градустан артыкны тәшкил иткән һава температурасы булырмы дигән сорауга җавап бирә.

— Андый эсселек быел булмаячак. Ялларда 30 градустан артып китсә дә, бу атна башында 25 градус җылы һава торышы сакланачак. Атна ахырында 30 градуска җитәчәк, әмма нык кыздырмаячак. Бу күрсәткеч июнь ае өчен аномаль саналмый. Язын һәм җәй башында җиргә җитәрлек дым керде, шунлыктан корылык куркынычы янамый, — дип белдерде Вильфанд. Бу хакта «Российская газета» басмасы яза.

Галим фаразлавынча, быелгы җәй җылы булачак, әмма тотрыклы түгел. Бер эссе, бер суык булыр дип көтелә.

Фото: http://tatar-inform.tatar

http://maydan.tatar