Иләбәр авыл клубында вәгазь кичәсе узды

    Рамазан аеның соңгы ун көне дә узып бара. Пәйгамбәребез Мөхәммәд Мостафа галәйһиссаләм  үзенең мөбарәк хәдисендә: «Рамазан аеның беренче ун көнлеге—Аллаһы Тәгаләнең рәхмәте көннәре, икенче ункөнлеге—гөнаһлардан пакьлану көннәре һәм соңгы ун көнлеге—җәһәннәм утыннан котылу көннәре», дигән . Рамазан аеның соңгы ун көне аеруча кадерле, кыйммәтле, чөнки бу айның ахырында истәлекле көннәр бар. Шуларның иң кадерлесе— ул да булса Кадер кичәсе. Мәгълүм булганча, бу изге кичәдә Аллаһы Тәбарәкә вә Тәгалә Расүлаллаһ галәйһиссаләм хәзрәтләренә Коръән иңдерә башлаган. Бу көннәрдә хак дин тотучылар гамәл-гыйбадәтләрен тагын да арттыра төшә, изге айның соңгы көннәрен мөмкин кадәр кадерләп калырга тырыша. Иләбәр авылы клубында узган дини чара да әнә шул көннәрнең әһәмиятен аңлатудан башланды. Вәгазьгә Лесхоз авылы имамы Әхмәд хәзрәт Сафин чакырылган иде. Сүз, нигездә, Аллаһка иман китерү, Раббыбызның  китапларына, пәйгамбәрләргә, фәрештәләргә, тәкъдирнең яхшысы да яманы да Аллаһтан икәнлегенә, үлгәннән соң терелүгә ышану турында барды, иман нигезләре аңлатылды. Ахырдан Иләбәр авылы имамы Рушан хәзрәт Гыйльманов Әхмәд хәзрәткә мәхәллә халкы  исеменнән зур рәхмәтен җиткерде. 

Мондый эчтәлекле очрашу Эзмә авылында да узды.