Иртә таңнан сәхәргә торучыларга

-Җиһанның иң бәрәкәтле халәте - дөньяны ай нуры күмгән чакта Син, Аллаһның сөекле колы,төнге татлы йокыңны  бүлеп сәхәргә уяндың...

-Аллаһ тәгаләнең рәхмәт фәрештәләре иңнәреңә кагылып уяткандыр? Алар сине ышбу дөнья йөзеннән киткәч, икенче дөньяда да каршы алырлар. Җәннәтнең Әр-раян дигән капкасыннан кертеп, Оҗмах түрләрендә урын бирерләр. Әәмиин. 

-Сәхәр торып аяк баскан әдам баласының һәр адымы саен әҗер-савап аның. Инде таң намазы кылырга ниятләп йөрүеңме? субхәналлаһ! Аллаһ каршында җавап бирүләре җиңел булыр Ин Шәә Аллаһ.!

-Сәхәр торып намаз укыганның исән чакта йөзе, үле чакта кабере нурлы булып балкып торыр диләр. Сәхәр вакыты хозурдыр, саваплары зурдыр. Сызылып таңнар аткан чакны тоту үзе бер рәхәттер.

-Туып килүче көнең җиңел үтсен. Аллаһ сине сабырлыктан өзмәсен. Сәхәрдә җаныңа иңгән ай нуры ифтаргача Сине саклап, яклап йөртсен! Әәмиин!                           Олы хөрмәт һәм изге теләкләр белән,

Рөстәм хәзрәт Гәрәев,

Биккол авылы мәчете.