Исламия Мәхмүтова: «Хәлил вафатыннан соң да Яңа елны ялгызым гына каршылаганым юк»

– Бу ел узганнарыннан әллә ни аерылып тормады кебек. Гадәттәгечә, гастрольләр, чыгышлар, яңа образлар. Үземнең «Ефәк баулы былбыл кош» премьерасы дөнья күрде, шөкер, тамашачы аны яратып кабул итте. Кәрим Тинчурин театры спектакльләрен Мәскәү, Самара өлкәләрендә дә тәкъдим иттек. Кызым Лилиянең юбилей кичәсен зурлап уздыр­дык. Хәлил вафатыннан соң үзем генә яшәсәм дә, Яңа елны бер кайчан да ялгызым гына каршылаганым юк. Балалар, оныклар килеп котлап китә, күршемдә генә мәрхүм язу­чы Фәнис Яруллинның хатыны Нурсөя яши. Ул керә. Ашыбызны да бүлешеп ашыйбыз аның белән. Бәйрәмгә дуслар җыела. Балачакта яңа ел аеруча күңелле уза иде. Кем өйрәткәндер инде, чыршы янына чыгып, шигырьләр сөйли идек. Кием, уенчык та юк ул чакта. Шулай да күңелле булган. Сәгать курантлары 12не сукканда, әни гел: «Яңа ел, төкле аягың белән кил, ил башлыкларына уртак тел табып, тынычлыкта яшәргә насыйп ит, исәнлек бир», – дип, теләкләрен тели иде. Мин шул традицияне дәвам итәм. Сәгать 12не сукмыйча ятканым юк. Бөтен нәрсә бар бит хәзер, Аллага шөкер. Яраткан эшең булу – үзе бер бәхет. Рәхәтләнеп яшәргә генә кирәк. Аллаһы Тәгалә исәнлектән аермасын.

http://shahrikazan.com