Өстәгеләргә – спектакль, халыкка – фаҗига

Без язганнарның буявы да кибеп өлгермәде, Сүрия Идлибы тирәсендә вакыйгалар куерды, Англиядә Солсберига химик һө­җүм тирәсендә вакыйгалар яңа­дан кискенләште. Бер-берсеннән бик ерак торган кебек тоелган бу ике вакыйга асылда бер-берсенә корыч җепләр белән тегелгән. Америкалылар, Асад гаскәрләре Идлибтагы гыйсъянчылар өсте­нә химик агу коярга җыена, дип шаулый башлады һәм бу хәл була калса, җавап уты ачарга вәгъдә иттеләр. Асад администрациясе бүген Кремль филиалы буларак кабул ителә, шуңа күрә Сүрия диктаторы ни генә кыланса да, җавапны рос­сиялеләргә бирергә туры киләчәк. Моны Мәскәүдә дә яхшы аңлыйлар, шуңа күрә тупны көнбатышлылар капкасына тибеп кертергә теләп, химик корал белән спектакльне безнең оппонентлар оештыра, дигән гауга кузгалтырга тырыштылар. Асад исә үз очкычларын Россия базасына яшереп бетерде инде.

Димәк, үзара бәрелешү котылгысыз. Трамп та хәрби диңгез көчләрен һәм очкычларны Сүрия мәйданына яңадан якын китерде. Әлбәттә, үзара каршылыкка керүче илләрнең югары җитәкчелеге адымнарны үзара килешеп ясый, сугыш уенын бергәләп уйныйлар, әмма вәзгыять теләсә кайсы миз­гелдә контрольдән чыгып китәргә ихтимал. Югарыдагылар спектакль уйныйбыз дип кенә санаса да, Якын Көнчыгышта чын кан түгелә. Күпне күргән сүриялеләр инде Идлиб мәйданында кан коелыш көтәләр, бугазлашу инде башланып килә: Россия очкычлары беренче бомбаларны яудырып өл­герде. Идлиб бугазлашуына рәсми рәвештә Берләшкән Мил­ләтләр Оешмасы һәм Төркия каршы төште. Кувәйт әмире белән очрашуда Трамп та, Идлиб вәх­шәтенә юл куярга ярамый, дигән фикер әйтте. Бүген, җомга көн, Куркынычсызлык Советы, шул мәсь­ә­ләне карау өчен, тулы составында җые­лырга тиеш. АКШ һәм Төркия тышкы эшләр министр­ларының Идлибта Рос­сиягә каршы тору турында үзара килешүләре дә мәгъ­лүм. Тагын бер нәрсәне искә төше­рик: Идлиб Россия, Иран һәм Төр­кия тарафыннан сугыш хәрәкәт­ләре тыелган зона дип игълан ителгән иде, шуңа күрә анда гыйсъян­чыларның төп көчләре дә тупланды, качаклар да сыенды. Россиянең үзе имзалаган киле­шүләргә төкереп каравы беренче тапкыр гына түгел инде, шуңа күрә хәрби очкычларның тынычлыкны бозачакларына шиклә­нергә ки­рәкми.

Солсберига әйләнеп кайтыйк. Соңгы көннәрдә Англия ягы Скрипальне агулаучыларның фотоларын киң җәмәгатьчелеккә күрсәт­те, аларның псевдонимнарын атады, чын исемнәре дә мәгълүм икәнлеген хәбәр итте. Яшерен химик корал кулланучылар Россия­нең Дәүләт разведкасы агентлары икәне дә мәгълүм дигән фактларны да өстәде. Химик корал Идлиб белән Солсберины бер яссылыкка куячак һәм Россия кискен рәвештә гаепле дип табылачак. Мәскәү, билгеле, һәртөрле гаепләүне дә кире кага, ташны көндәшләр бакчасына ыргыта. Тик әлеге вәзгыятьтә кем хаклы, кем гаепле булу бернинди дә роль уйнамый, гаепне кемгә сылтаячаклар – шунысы мөһим. Англия инде бүген үк Россиягә каршы санкцияләрне ашыктырырга кирәк дип саный һәм шулай ук проблеманы Берләшкән Милләтләр Оешмасы дәрәҗәсенә күтәрергә җыена.

Идлибка бомбалар яудырып, Асад һәм Россия халыкара җә­мәгатьчелекнең һәм Берләшкән Милләтләр Оешмасының ихтыярына каршы киләчәкләр. Без фаразлыйбыз: якын килчәктә Идлиб суешы котылгысыз, чөнки яклар­ның берсе дә чигенергә һәм юл куярга җыенмый.

Америка ягы исә Россиягә кар­шы көрәшкә мөселман иллә­ренең коалициясен туплый, НАТО һәм мөселман гаскәр­ләренең киләчәк­тәге аркадашлыгын әзер­ли. Россия тышкы эшләр министры Лавров исә АКШ белән кораллы бә­релеш ихтималы зур булуны таныды.

Россия – НАТО мөнәсәбәтләре тагын бер фронтта кискен­ләш­терелә: Украина белән хәлләрне бик теләп катлауландыралар. Көн­батыш белән Кремль бер үк документларны төрлечә укыйлар һәм төрлечә аңлыйлар. Ике як та бер-бер­сен­нән Минск ки­лешү­ләрен үтәүне таләп итәләр. Кремль фикеренчә, килешүне Киев боза, Вашингтонда һәм Брюс­сель­дә фи­керләр моның капма-кар­шысы юнәле­шендә. Аңла­шыла инде: ике як та үзенең эчке проблемаларын сугыш гаугасы чыгарып хәл итәргә тели. Барлык мәй­даннарда да икътисади хәл кис­кенләшә, халыкларны бары тик кискен конфликтлар ярдә­мендә генә гипнозларга мөм­кин хәзер. Дөнья финанс базарларында кискен тет­рәнү башланыр алдыннан, безнең зур сугыш ша­һитлары да булуыбыз бик мөм­кин. Финанс давылы башланырга исә санаулы айлар гына калып бара.

http://vatantat.ru