Яңгырлы көздә

Кояшның   да күренәсе  килми,

Алсу йөзен миннән яшергән ул.

Болытларны куып, җил кошларга

Күрсәтә күк ерак сәфәргә юл.

Газиз җирдән - туган якларыннан

Аерылып китә кошлар кабат.

Фатихасын биргән ана сыман,

Басып тора кызыл миләш карап.

Күңел халәтемне аңлагандай,

Башын игән балан тәлгәшләре.

Шат күңелле гөләп чәчәгенең

Ал битеннән тама күз яшьләре.

Моңсуланып карап торам һаман,

Күздән кичеп күксел урманнарны.

Яуса ни дә?!.. Яңгыр юа бит ул

Тәрәзәдән җәйге тузаннарны.

Сөмбелә Ибраһимова