Хатын-кызга җитмеш төрле һөнәр дә азмы?
“Россия тимер юллары” компаниясе хатын-кызлар өчен тыелган һөнәрләр исемлеген юкка чыгарырга тәкъдим иткән. Аерым алганда, 2000 нче елда кабул ителгән әлеге исемлек нигезендә гүзәл затларга машинист булып эшләргә ярамый икән. “Замана белән беррәттән, эш шартлары да үзгәрә. Хәзер элеккеге локомотивлар юк, барысы да автоматка корылган. Шуңа күрә машинист булып хатын-кыз да эшли ала”, – дигән оешма вәкилләре. Гүзәл затны эшкә алыргамы-юкмы икәнен эш бирүче үзе хәл итсен, дип тә өстәгәннәр. Әйтүләренә караганда, Россия Дәүләт Думасында нигездә сәнәгать тармагына бәйле булган һәм шактый искергән 450ләп һөнәрдән торган исемлекне яңадан карап тикшерергә ризалашканнар да инде. Хатын-кызга җитмеш төрле һөнәр дә азмы?
Раил МАРАКОВ, Теләче районы, Иске Җөри авыл җирлеге башлыгы:
– Миңа калса, чикләүләр кертү дөрес түгел. Кеше эшләргә тели икән, аңа ник каршы төшәргә соң? Бу – хатын-кыз эше, монысы – ир-атныкы дип карарга ярамый. Бөтенесе дә кешенең сәләтеннән тора. Ир-ат эше дип уйлаган хезмәтне хатын-кыз менә дигән итеп башкарып куя ала икән, димәк, ул – бу эшнең чын остасы. Кешенең кулы һәр эшкә дә ятып тормый. Ә күңел кушкан хезмәт күбрәк файда китерә. Чикләүләрнең эшсезләр саны артуга китерүе дә бар.
Миләүшә ЗӘЙНУЛЛИНА, трамвай йөртүче (Казан):
– Хатын-кызларны эшкә алганда чикләүләр булмаска тиеш дип саныйм. Бер караганда, асыл затлар кайбер очракларда ирләр эшен остарак та башкара әле. Шөкер, курку белмәс, гайрәтле хатын-кызлар аз түгел. Минемчә, һәр кеше күңеленә хуш килгән эшне башкарырга тиеш. Әйтик, авыл кызы булсам да, кечкенәдән трамвай йөртүче һөнәре ошый иде. Шуңа күрә, ике дә уйламыйча, әлеге хезмәтне сайладым. Инде тимер юлдан йөри башлавыма да – 30 ел. Яшем 52дә булмаса, машинист та булыр идем әле. Әгәр таулар күчерерлек көчең бар икән, нигә эшләмәскә?
Гөлфизә МУЛЛАНУРОВА, Казан технология һәм дизайн көллияте укытучысы:
– Хәзер хатын-кызга җитмеш төрле һөнәр дә аз. Фән-техника, компьютер-электроника заманында бер һөнәр белән генә яшәп тә булмый. Теләсәң-теләмәсәң, заманага иярергә туры килә. Димәк, бу өлкәне дә өйрәнәсең. Шул ук вакытта хатын-кызның ашарга пешерү, тегү-чигү, укыту, юу, җыештыру кебек санап бетерә алмаслык һөнәрләре дә шактый күп бит аның. Боларны да исәпкә алсаң, бер хатын-кыз җилкәсенә төшкән һөнәрләр саны җитмештән артып та китәдер. Аннан соң, кайда гына эшләми бит хатын-кыз! Элек кенә хатын-кыз Айга очкан, дигән хәбәр яңалык булып кабул ителә иде. Заман белән бергә атлый бүген хатын-кыз.
Рәнис ГАББАСОВ, җырчы:
– Мин хатын-кызларны машинист булып эшләтүгә каршы. Чөнки әлеге хезмәт гүзәл затлар өчен бик авыр дип саныйм. Өстәвенә тора-бара сәламәтлеккә бәйле проблемалар да килеп чыгарга мөмкин. Хатын-кыз ул чәчәк кебек булырга тиеш. Ә без, ир-атларның бурычы аларны саклаудан гыйбарәт. Бүген машинист һөнәреннән башка да хатын-кызлар башкарган авыр хезмәтләр җитәрлек. Гүзәл затларыбызның төп эше гаилә учагын саклау һәм балалар тәрбияләү булсын иде.
Рөстәм АСАЕВ, Татарстанның атказанган артисты:
– Һәрбер хатын-кызның иркәләнеп, назланып яшисе киләдер инде ул. Сүз дә юк, хәзер күп эшләр автоматлаштырылды. Машинист һөнәрен башкарырлык хатын-кызлар бардыр дип уйлыйм. Моңа шаккатасы да түгел. Күптәннән инде маршрут автобусларын йөртүче гүзәл затлар очрый. Рухи яктан да, физик яктан да ирләрдән көчле ханымнар җитәрлек. Хатын-кыз бар эшне булдыра дисәк тә, күбесе аның чарасызлыктан, гаиләсен туендырыр өчен мондый эшкә бара. Ире мал тапса, берәү дә авыр эшкә алынмас иде. Бер уйлаганда, машинист һөнәренең авыр ягы юк та шикелле. Әмма мин хатынымны мондый эшкә җибәрмәс идем. Артист хатыны булу да ул – үзе бер һөнәр. Әлегә балаларны тәрбияли, миңа терәк булып тора. Барлык ханымнарның да янәшәсендә таянырлык кешеләре булсын.
Следите за самым важным и интересным в Telegram-каналеТатмедиа
Нет комментариев