Аксубайда, яшен сугып, өч катлы торак йортның түбәсенә ут капкан

автор, 20 июль 2018 - 16:27

941

Йорттан 81 кешене эвакуацияләгәннәр, аларның берсе дә зыян күрмәгән.

Аксубайда, яшен сугып, өч катлы торак йортның түбәсенә ут капкан. Бу хакта «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсе матбугат хезмәтеннән хәбәр иттеләр.

Бүген иртәнге җиделәр тирәсендә Гадәттән тыш хәлләр министрлыгы хезмәткәрләренә Шоссе урамындагы 82нче йортта янгын чыгуы хакында хәбәр иткәннәр.

Әлеге йортта яшәүчеләр 102нче янгын-коткару часте хезмәткәрләренә өйнең чормасын яшен сугып, яна башлавы хакында сөйләгән. Шуннан ялкын телләре бинаның түбәсенә күчкән һәм аны тулысынча камап алган. Йорттан 81 кешене эвакуацияләгәннәр, аларның берсе дә зыян күрмәгән.

Ут белән көрәшүчеләргә Иске Илдерәк, Иске Тимошкино, Иске Кыязлы һәм Иске Татар Адәм суы авылларыннан ирекле янгын командалары ярдәмгә ашыккан. Янгын 480 квадрат метр мәйданны биләп алган. Аны ярты сәгать эчендә сүндергәннәр.